29 Тохсунньу 29.01
  • -48°
  • $ 73,82
  • 83,32

Федеральнай бырагырааманан Саха сиригэр суолу туталлар

10:50, 14 октября 2016

Уһук Илиҥҥэ тыа сирин бигэтик сайыннарыы федеральнай тус сыаллаах бырагыраама чэрчитинэн суолу тутуу Саха сиригэр эрэ оҥоһуллар. Бу күннэргэ Хаҥалас оройуонугар муниципальнай суолталаах асфальтаммыт суолу үөрүүлээх быһыыга-майгыга астылар.


«Быйыл өрөспүүбүлүкэҕэ маннык 9 эбийиэк тутуллар, итинтэн сэттэтэ номнуо түмүктэннэ. Федеральнай бырагыраама чэрчитинэн үлэ салҕыы барар», — диэн СИА-ҕа тырааныспар уонна суол хаһаайыстыбатын миниистирин солбуйааччы Сергей Владимиров эттэ.

Суол хаһаайыстыбатын үлэһиттэрин күннэрин саҕана Нөмүгү нэһилиэгэр уопсайа 1,35 км уһуннаах, «Умнас» өрөспүүбүлүкэтээҕи суолу кытта холбуур айан суола аһылынна. Онон, олохтоохтор улуус киинигэр уонна Дьокуускайга мэһэйэ суох тиийэр кыахтаннылар. Оройуон уонна сэлиэнньэ салалталара бырабыыталыстыбаҕа, тырааныспар уонна тыа хаһаайыстыбатын министиэристибэлэригэр улахан махталларын тиэртилэр.

Дьокуускай «Хот» тэрилтэтэ үлэни иилээтэ-саҕалаата, бэдэрээччит – «Хаҥалас суола» компания буолла. Манна федеральнай бюджеттан уопсайа 15 мөл.солк., өрөспүүбүлүкэ бюджетыттан 16,5 мөл.солк. бэриллибитэ.

Уһук Илин федеральнай уокурукка 2014-2017 сылларга тыа сирин бигэтик сайыннарыыга анаммыт тус сыаллаах федеральнай бырагыраамма Саха сиригэр эрэ үлэлиир. Бырагыраама 2020 сылга диэри болдьохтоох. Федеральнай үп-харчы суотугар өрөспүүбүлүкэҕэ 19 эбийиэк тутулунна.

0
0
29 января 29.01
  • -48°
  • $ 73,82
  • 83,32