21 От ыйа 21.07
  • 28°
  • $ 88,02
  • 96,04

«Фатима бэлимиэнэ» бэйэтигэр дьону тардар

09:19, 12 апреля 2018
Текст:
Читайте нас на
Яндекс Новости
ЯДВ

Дьарыктаах буолууну көҕүлээһин сылыгар Өймөкөөн улууһун олохтоохторо араас толкуйу тобулаллар.

Томтор нэһилиэгин олохтооҕо Фатима Луковцева социальнай үлэһитинэн үлэлии сылдьан, биэнсийэҕэ тахсан баран, бэйэ дьарыктаах буолара ордук диэн санааҕа кэлбитэ. Билигин кини нэһилиэк киинигэр чайной аһан үлэлэппитэ икки ый буолла.

«Улахан кыыспар кэргэним ийэтэ бэйэтэ олорбут дьиэтин анаабыта. Үс оҕолоох дьиэ кэргэни икки мэндиэмэннээх дьиэбэр көһөрөн ылан, кыыспынаан  манна чайной аһан үлэлэтэн боруобаланарга санаммыппыт. Оҕом повар идэлээх. Дьокуускайга эрэстэрээннэргэ, кафеларга астаабыт уопуттаах киһи. Оҕотугар олорор буолан, дойдуларыгар көһөн кэлбиттэрэ. Ол кэмҥэ дьиэ кэргэнинэн бэйэ дьыалатынан дьарыктанан көрөргө сананныбыт. Бастаан утаа аһылларбытыгар: «Чэ, сүтэрэрбит суох, табыллыбатаҕына тохтуохпут«, — диэн санаалаах саҕалаабыппыт. Үөрүөхпүт иннигэр, дьон истиһэ- истиһэ кэлэн, билигин чайнойбут аана сабыллыбат, — диэн кэпсиир Фатима Луковцева.

Кырдьык, тыа сиригэр командировкаҕа сылдьар дьон сылаас астаах аһыыр сиргэ наадыйара кэмнээх буолуо дуо? Буолаары буолан, нэһилиэк хабыллар ортотугар. Фатима аһын менюта күн аайы уларыйа турар. Кини дьиэтээҕи бэлимиэнэ аны «Фатима бэлимиэнэ» диэн анаан сакаастанар аһынан буолла. Минньигэс, тотоойу бэрэскитин дьон эмиэ дьиэлэригэр ылан бараллар эбит этэ.

Араас тэрээһиннэргэ буспут аһы анаан сакаастыыр буоллулар. Онон үлэбит көрүҥэ элбээн иһэр. Кыһалҕабыт диэн, дохуоппут бүтүннүү олохтоох маҕаһыынтан бородуукта атыылаһарбытыгар барар. Массыынабыт оҥоһуллара буоллар, чэпчэки сыаналаах аһы куораттан аҕалыа этибит. Чэ, барыта орун оннугар түһэн иһиэҕэ. Саҥа саҕалааһын буолан, туох итэҕэстээхпитин барытын үөрэтэ сылдьабыт, — диэн санаатын үллэстэр бэйэтин бэйэтэ үлэнэн хааччыммыт Фатима Луковцева.

Тыа сирин дьоно ити курдук ким тугу сатыырынан, туохха кыахтааҕынан «үлэ суох» диэн ытаммакка, бэйэлэрин кыахтарынан, интэриэстэринэн үлэ миэстэтин тобулаллар.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Андрей Сорокин түһэриитэ.

0

0
Следите за самым важным и интересным в Telegram-канале и WhatsApp-группе ЯСИА