Эбээн Бытантай улууһун Дьарҕаалаах нэһилиэгин олохтооҕо Федор Колтовской буран тутта тутта. Биллэр эстремал-айанньыт Марина Галкина ютуб-каналыгар сурутааччылара харчы хомуйан, хоту дойду хоһуунугар соһуччу бэлэх оҥордулар.
Дьарҕаалаах олохтооҕо Федор Колтовской этэринэн, Арассыыйа биллиилээх айанньыта, спортсменка Марина Галкина былырыын саас кулун тутар ыйга Эбээн-Бытантай улууһугар кэлэ сылдьыбыт. Бөһүөлэктэн 170 км тэйиччи Кимпииччэ үрэх баһыгар турар Дьайбалаах күөлүгэр хайыһарынан тиийбиттэр. Таһаҕастарын сүкпүтүнэн, аара хоно-хоно.
— Биһиги, Василий Стручков кэргэнинээн Иралыын уонна мин, кини кэлэрин туһунан эрдэттэн рациянан истибиппит. Биллэрбиттэрэ. Күндү ыалдьыты олус долгуйа күүппүппүт. Балайда тэйиччи сир буолан, хайдах кэлэр диэн санаарҕаан да ылбыппыт. Айан ыарахаттарын ааһан, кэлиэхтээх сиригэр кэлбитэ. Кинини аара суолга Василий көрсүбүтэ. Наһаа да дьулуурдаах, сөҕүмэр күүстээх санаалаах, эрчиллиилээх спортсменка кыыс диэн сөхпүппүт.
Марина кэлэ сылдьан биһиги хоту дойдубут айылҕатын олус сэргээбитэ, кыраһыабайын, тыйыһын сөхпүтэ. Туристар сырыттахтарына наһаа астыныахтар эбит диэбитэ.
Бу кэлэ сылдьан Марина Федорга бэйэтэ суруйбут икки кинигэтин бэлэхтиир. Ол кинигэлэри хоту дойду хоһууна ааҕан баран, бэйэтэ уруккуттан хоһооннору суруйар буолан, «Мои просторы» диэн киниэхэ анаан ырыа айар.
— Марина Галкина экстремальнай айанын туһунан ютубка бэйэтин ханаалыгар таһаарар. Устубут видеоларын сурутааччылара сэргээн, харчы мунньан, миэхэ “Лидер” диэн буран көлөнү бэлэхтээн олус үөртүлэр да, соһуттулар да.
Күүтүүлээх тимир көлөм Саҥа Дьыл иннинэ, кыһыҥҥы суол арыллаатын кытта бастакы массыыналарынан Эбээн Бытантайга кэлэн сүрдээх үөрүү-көтүү буоллум, сабыс-саҥа бураммынан билигин ыллыы-туойа сүүрдэ сылдьабын, — диэн «Бытантай уоттра» хаһыакка кэпсээтэ.
Федор кэпсээнин түмүктээн баран, көмөлөспүт дьоҥҥо махтанан туран, саҥа бураныгар «Добро людям» аат биэрбитин кэпсээтэ.
Ааптар: Сардана Копырина, Эбээн-Бытантай улууһа
This post was published on 25.01.2022 13:02 13:02