Эргиир үҥкүүтүн бэстибээлэ ыытылынна

Муус устар 15 күнүгэр “Саргы түһүлгэтэ” култуура киинэ сарсыардаттан оҕо саҥатынан чугдаарда. Бу күн аан бастакытын оҕолорго аналлаах өрөспүбүлүкээнискэй эргиир үҥкүүтүн бэстэбээлэ ыытылынна. Бэстэбээли көҕүлээтэ, “Эркээни эдэр сааһа” норуодунай үҥкүү ансаамбылын 49 сылын салайан илдьэ сылдьар, баар суох ытык киһибит Василиса Егоровна Романова.

Бириэмэтэ табыгаһа суох күҥҥэ ыытыллан хомойуох иһин атын улуустан биир Горнай улууһа кэлбит, барыта алта кэллэктиип кытынна.

Дьүүллүүр сүбэҕэ өрөспүүбүлүкэбитигэр биллэр дьоһун сурахтаах дьоммутун ыҥырбыттара, бэстэбээл таһымын үрдэттэ, ол курдук дьүүллүүр сүбэҕэ олордулар: ХИФУ преподавателя филологическай наука доктора Ефимова Людмила Степановна, Сергей Зверев – Кыыл Уолун талба кийиитэ норуот маастара Анна Николаевна Зверева, Култуура коллеһын преподавателя СР култууратын туйгуна Михаил Николаевич Винокуров.

Тохтобулга “Эркээни эдэр сааһа” үҥкүү кэллэктиибин оҕолоро уонна Өктөм “Барҕарыы” КК специалиһа Василий Капырин, Лидия Харитонова буоланнар Хаҥалас оһуокайын араастарын көрдөрөн үҥкүүлэттилэр.

Эбиэттэн киэһэ үҥкүү салайааччыларын кытта төгүрүк остуол истиҥ – иһирэх сыһыаҥҥа ааста. Жюри чилиэннэрэ салайааччыларга үтүө сүбэлэри биэрдилэр уонна эһиил «Эркээни эдэр сааһа” үбүлүөйдээх сылын көрсө В.Е.Романоваҕа Хаҥалас оһуокайын чинчийиитин түмэн, оһуокай хамсаныыларын, дьаамсыктар хороводнай үҥкүүлэрин сөргүтэр сыаллаах, эргиир үҥкүүтүгэр аналлаах кинигэ бэлэмнээн таһааттарарыгар сүбэлээтилэр, бэйэлэрэ кинигэ күн сирин көрөрүгэр көмөлөһүөхпүт диэн эрэннэрдилэр.

Гала концерт түмүгүнэн бастыҥнарынан ааттаннылар Аксиния Ушницкая, Светлана Негнюрова салайааччылардах «Сардаана” оҕо саадын “Току – току ньээм, ньээм” ансаамбыла, 1 – степеннээх лауреат үрдүк аатын ыллылар, биэс саастаах оҕолор барахсаттар бары күргүөмүнэн Хаҥалас оһуокайын араас хамсаныыларын көрдөрөн таптылар, иккис лауреат Горнай Бэрдьигэстээҕиттэн “Сардаана” детсад иитиллээччилэрин “Аламай сулус» ансаамбыла, «Дымовские барыни» салайааччы Терентьева Туйгууна, олус кэрэ көстүүлээх үҥкүүнү туруорбут, оҕолорун таҥастара олус үҥкүү матыыбыгар барсардык тигиллибит буолан, көрөөчүлэр биһирэбиллэрин ылыан ыллылар, кырачааннар улахан сыанаҕа тахса үөрэммит буоланнар, олус холкулар уопсайынан салайааччылара бары өттүттэн айымньылааҕа тута көстөр, үһүс лауреат аатын сүктүлэр Ой оскуолатын 3 «а» кылааһын үөрэнээччилэрэ «Сертаки» греческай үҥкүүнү толордулар, салайааччылара Родионова – Ильина Евдокия, Данилова Татьяна, бастакы степеннээх дипломаннарынан ааттаннылар Булгунньахтаах искусство уонна музыка оскуолатын иитиллээччилэрэ «Эбэҥки” норуотун үҥкүүтүн көрдөрдүлэр, салайааччы СӨ култууратын туйгуна Надежда Мордовская, иккис дипломаннарынан буоллулар Покровскай № -3 оскуолатын үөрэнээччилэрэ «Русские узоры» салайааччылара Бэлла Шапошникова СӨ үөрэҕэриитин

туйгуна, Ирина Сыромятникова, Анна Тихонова, үһүс дипломаннарынан ааттаннылар “Сказка” детсад кырачааннара “Солнечные лучики” ансаамбыла салайааччылара Варвара Маркова, Мария Степановна Кривошапкина, нуучча оҕолорун кытыннаран олус сэргэх, түмсүүлээх эйэ оһуокайын туруорбуттар.

Галаҕа эҕэрдэ нүөмэрдэринэн киэргэттилэр «Эркээни эдэр сааһа» норуодунай үҥкүү кэллэктиибэ «Дьөһөгөй үҥкүүтэ», Никита Космисткэй “Мин Хаҥалас уолабын” ырыаны уу сахалыы ыллаан, көрөөчү биһирэбилин ылла, Покровскай №-1 оскуолатын үөрэнээччилэрэ, хомус ансамбыла салайаччы Светлана Герасимова.

Кэнсиэр кэнниттэн барыларын наҕараадалаатылар, дьүүллүүр сүбэҕэ «Саргы түһүлгэтин» аатыттан култуура директора Лариса Николаевна Владимирова дьөрбө сибэккилэри, бэстэбээл логатиптаах сэмэй бэлэхтэрин үөрүүлээх быһыыга туттарда уонна үүнэр көлүөнэ сайдыытыгар тустаах бэстэбээли үтүө үгэскэ кубулутан сылын аайы ыытыахха диэн этии киллэрдэ, бырайыак автора Василиса Романова, махтал үтүө тылларын анаата.

Инникитин бу олус интириэһинэй, сонун бырайыагы болҕомтоҕо ылан, эһиил «Эркээни эдэр сааһа» норуодунай үҥкүү кэллэктиибэ үбүлүйдээх сылын улуус былааныгар киллэттэрэн, өссө үрдүк таһымнаахтык ыыталларыгар баҕарыам этэ. Олохпут баар суох матырыйаалнайа суох култуурабыт сайдыыта, детсад саадыттан сөргүтүллэн эрэрэ хайҕабыллаах суол.

Бу тэрээһиҥҥэ кыттыбыт бары бэстэбээл кыттыылаахтарыгар баҕарыам этэ өссө ситиһиилээх айымньылаах үлэни, оҕолор талааннарын сайыннаран, или иилиир, сомоҕолуур түһүлгэбит, үүнэн – сайдан көлүөнэттэн, көлүөнэҕэ, салҕана, туругура турдун диэн алгыс тылбын аныыбын.

Лидия Харитонова «Хаҥалас» хаһыат общественнай кэриспэндиэнэ.