19 От ыйа 19.07
  • 16°
  • $ 87,88
  • 96,1

Эргэрбит сөмөлүөт хаһан саҥардыллар?

09:21, 23 августа 2018
Текст:
Читайте нас на
Яндекс Новости
ЯДВ

Сааскылаахха көтөөрү, Дьокуускай аэропуордугар киирэн турабын. Биир уһугар билиэт сыаната 24000 солк. даҕаны буоллар, эдэр ыаллар иккилии-үстүү оҕолорун илдьэ айаннаан иһэллэр. Күн уотугар дуоһуйа сыламнаабыт сирэйдэрин көрдөххө, бука, соҕуруу дойду сылаас муоратыгар сынньанан, сөтүөлээн иһэллэр. Улахан ЖК-телевизор, оҕо бэлэсипиэтэ тутуурдаахтар. Таһаҕастара 20 киилэттэн таҕыстаҕына, ону барытын төлөттөрөллөр. Хаһан регистрация бүтүөр диэри нуорматтан тахсыбыт багааһы төлөөрү каассаҕа уһун уочарат. Харчы хамсыы-хамсыы киирэр быһыылаах.

Бары хомуллан, Ан-24 сөмөлүөккэ киирэбит, бу көтөр аалбыт букатын даҕаны ааспыт үйэттэн сири-сибиири бараабыт, айан бөҕөнү айаннаан, тырыттыбыт, эргэрбит-элэйбит көрүҥнээх. Ойоҕос эркиннэрэ салгын сиэн саһаран, киртийэн, харааран хаһан да сууллубатах, саҥардыллыбатах көрүҥнээхтэр. Ханан эрэ хайа тардыллыбыта аатыгар абырахтаммыт.

Бу сөмөлүөккэ 32 пассажирскай кириэһилэни аахтахха, биир рейсэҕэ Сааскылаахха бара-кэлэ 1,5 мөл. солк. киирэр. Куруук тоҕо эрэ дьоҕус авиацияҕа харчы тиийбэт аатырар. Хаһан эрэ лүөччүктэр хамнастара кырата 500 000 солк. үһү диэни истэн сөхпүтүм. Биир көтүүгэ мөлүйүөнүнэн харчыны оҥорор эрээри, ити тоҕо сөмөлүөттэрин иһин сууйбаттара, саҥардыбаттара буолуой? Кириэһилэҕэ оҕолор бичиэнньэ кыырпаҕын эмтэритэн тохпуттара даҕаны хомуллубатах.

Инники соҕус эрээккэ түннүк таһыгар миэстэ булан олоробун. Сөмөлүөт обургу өссө да көтөр кыахтаахпын, буораҕым баар диэбит курдук өрө сүүрэн бэрт түргэнник кыырай күөх халлаан урсунугар уйдаран таҕыста. Түннүгүнэн көрбүтүм, шасси уктар уонна пропеллер эрийэр тимир куорпуһа буолталарынан эриллибитэ дэлби салыбыраан субу төлө барыах курдук көрүҥнээх. Өссө сэбиэскэй авиация саҕаттан сырыы бөҕөтүн сылдьыбыт сөмөлүөтү киһи аһынар даҕаны. Өссө бачча көтөрүгэр махтал курдук.

Интэриниэти арыйан көрдөххө, АН-24 сөмөлүөт 1959-1979 сс. диэри собуокка оҥоһуллубут. Бу сөмөлүөтүнэн билигин Африкаҕа уонна СНГ дойдуларыгар көтөллөр диэн суруйбуттар. Ол аата сайдыылаах дойдулар маннык тиэхиньикэттэн былыр сах аккаастаннахтара. Арай биһиги Сахабыт сирин улуустарыгар көтөллөр. Сонуннары көрдөххө, бу соторутааҕыта атырдьах ыйын 17 күнүгэр Дьокуускайтан Чокуурдаахха АН-24 сөмөлүөт саҥа көтөн иһэн хаҥас мотуора аккаастаан, суһаллык төннөн кэлбит, сиргэ хата этэҥҥэ түспүт.

Билиэт сыаната төһө да ыараханын иһин, биир да кураанах кириэһилэ суох, толору кэллибит. «Сөмөлүөппүт биир рейсэҕэ мөлүйүөнүнэн харчыны киллэрэр эрээри, арыый да аныгы олох сиэринэн саҥа, ыраас, тупсаҕай оҥоһуулааҕа эбитэ буоллар» диэн санаалаах Сааскылаахха үктэннибит. Хоту дойду ыраас чэбдик салгынынан көрүстэ.

Марианна Тыртыкова, «Саха сирэ», edersaas.ru

Следите за самым важным и интересным в Telegram-канале и WhatsApp-группе ЯСИА