Элбэх киһи мустар сиригэр тумуу көбөр, дьыл уларыйар кэмигэр чараастык таҥнан тымныйыы элбиир, оттон эми-тому атыылаһаары чугастааҕы аптекалары кэрийдэххэ, сыана арааһа сөхтөрөр: ханна эрэ ыарахан, ханна эрэ удамыр буолар, суруйда Саха парламент саайт.
Бу күннэргэ биһиги эрэдээксийэбитигэр маннык сурук киирдэ: «Синупрет» диэн гайморит эмэ 202-ис микрооройуоҥҥа баар поликлиника аптекатыгар 1080 солкуобайга турар, ону ыарырҕатан биһиги бу эми «Планета здоровья» диэн Ленин проспегар баар аптекаҕа 596 солкуобайга буллубут. Муниципальнай аптека ааттаах эрээри, оҕону көрөр поликлиникаларыгар сыана туох ааттаах үрдүгэй?» – диэбиттэр.
Ити ыйытыгы Саха Өрөспүүбүлүкэтин Сыана бэлиитикэтигэр судаарыстыбаннай кэмитиэтин пресс-сулууспатыгар ыытаммыт маннык хоруйу туттубут:
– «Синупрет» киһи олоҕун быыһыыр суолталаах эмтэр ахсааннарыгар киирбэт, ол иһин, төһө сыанаҕа атыылыыллара көҥүл. «Планета здоровья» федеральнай ситимҥэ киирэр аптека, инньэ гынан, бүтүн дойду үрдүнэн элбэх салаалардаах буолан, сыананы чэпчэтиэхтэрин сөп.
Атыыһыттар сыананы бэйэлэрэ быһаллар
Манна эбэн эттэххэ, эмп-томп атыытын бэрээдэгин, атыыһыт уонна атыылаһааччы сыһыанын «Эмп атыытын туһунан» диэн 2010 с. муус устар 12 күнүгэр ылыллыбыт 61 №-дээх федеральнай сокуон уонна «Өҥөнү, табаары туһанааччы быраабын көмүскээһин туһунан» диэн 1992 с. олунньу 7 күнүгэр ылыллыбыт 2300-1 №-дээх федеральнай сокуон олохтууллар. Эми-тому атыылыыр аптекалар фармацевтическай өҥөнү оҥорорго лиссиэнсийэлээх буолаллара ирдэнэр. Аптекаҕа эрэ буолбакка, эми-тому амбулаторияҕа, тыа сиригэр аптека суох түгэнигэр, биэлсэр-акушер пуунугар атыылыахтарын син.
Аптека оҥорботох эмигэр эми ханнык тэрилтэ оҥорбута, аадырыһа, хаһан оҥоһуллубута, сиэрийэтэ, дуозата, хайдах уонна төһө өр кэмҥэ харайыллара, туохтан сэрэниллиэхтээҕэ, сыаната сурулла сылдьыахтаах.
Урбаанньыттар эми атыылыылларын таһынан, тус гигиена, саҥа төрөөбүт кырачаан туттар тэрилин, оҕо аһылыгын, БАД-тары, парфюмерияны, косметиканы о.д.а. атыыга таһаарыахтарын сөп.
Сокуоҥҥа этиллэринэн, мэдиссиинэ бородууксуйатын сыанатын судаарыстыба хонтуруоллаабат, ол иһин атыыһыттар розницанан атыыга сыананы бэйэлэрэ быһаллар.
Кыайан төннөрбөккүн
Эми-тому, мэдиссиинэ тэрилин атыылаһар дьон табаар потребительскай көрүҥүн, ону хайдах туттары болҕойон көрүөхтээхтэр, эмтиир быраастарын кытары эрдэттэн сүбэлэһиэхтээхтэр. Доруобуйаҕын чөлүгэр түһэрэр тэрили аптекаттан атыылаһыахтааххын, дьиэҕэ олорон куйаар ситиминэн сакаастыыр, эбэтэр таһырдьа түбэһиэх дьонтон атыылаһар сэрэхтээҕин ааһан, кутталлаах буолуон сөп.
Аптекаттан атыыласпыт эмкин, мэдиссиинэ тэрилин кыайан төннөрбөккүн, ол эбэтэр Арассыыйа Федерациятын Бырабыыталыстыбатын 2020 с. ахсынньы 31 күнүгэр тахсыбыт 2463 №-дээх уурааҕар олоҕуран, төннөрүллүбэт табаар ахсааныгар киирэр. Оттон маҕаһыынтан ылбыт тэрилгин, холобур, таҥаһы кэппэтэххинэ, көрүҥүн буорту оҥорботоххуна, этикиэткэтин устубатаххына, 14 күн иһигэр төннөрөр бырааптааххын. Арай, эмкэ-томко уонна доруобуйаҕа туттуллар табаарга бу сыһыана суох.
Өскөтүн эмп-томп, мэдиссиинэ бородууксуйата сөп түбэспэтэҕинэ, аптека харчыгын төннөрөртөн аккаастыыр кыахтаах. Атыыласпыт эмкин-томкун, доруобуйаҕа туттуллар тэрили сөбүлээбэтэххинэ, сөп түбэспэтэҕинэ, туох эрэ итэҕэс көһүннэҕинэ, суут эрэ нөҥүө харчыгын төнүннэриэххин сөп. Ол «Өҥөнү, табаары туһанааччы быраабын көмүскээһин туһунан» 1992 с. олунньу 7 күнүгэр ылыллыбыт 2300-1 №-дээх федеральнай сокуон 17 ыстатыйатыгар суруллар.
Онон этиллибитин курдук, киһи олоҕун быыһыыр суолталаах эмп-томп ахсааныгар киирбэт эмп сыанатын аптекалар бэйэлэрэ олохтууллар.
This post was published on 22.10.2025 17:23 17:23