17 Тохсунньу 17.01
  • -48°
  • $ 73,82
  • 83,32

Эмчиттэр хордара тэриллибитэ 20 сылын туолла

17:00, 15 марта 2018
Текст:

Нууччалыы, сахалыы, опернай да ырыалары быраастар, биэлсэрдэр, сиэстэрэлэр үрдүк таһымнаахтык ыллыы туралларын истэн баран, бастаан итэҕэйбэтэҕим. Анал үөрэҕэ, идэтийиитэ суох дьон диэтэххэ, олус  иэйиилээхтик, истиҥник ыллаабыттара.


Эмчиттэр хордара медкииҥҥэ дьахталлар ансаамбылларын тирэх оҥостон, 1998 с. тэриллибитэ. Доруобуйа харыстабылын идэлээх сойуустарын көҕүлээһининэн, чуолаан Лидия Поликарпова, Полина Бугаева, профсойуус  бэрэссэдээтэлэ Людмила Корнилова көҕүлээһиннэринэн тэриллэн, билигин 40 киһи састааптаах  хор үлэлиир.

“Вдохновение” эмчиттэр хордарын старостата Альберта Пудовна Рожинаны кытары кэпсэттибит. Кини Сэллиги эмтиир научнай киин баклабораториятыгар эпидемиолог көмөлөһөөччүтэ, СӨ доруобуйа харыстабылын туйгуна.

— Эмчиттэр айар үлэттэн ыраах соҕустар диэн өйдөбүл баар. Бу, арааһа, сыыһа буолуо…

— Биһиги хорбутун ылан көрдөххө, ол чахчы сыыһа өйдөбүл. Быраастарбыт, хирурдарбыт күнү быһа үлэлээн, уустук эпэрээссийэҕэ туран баран, киэһэ хорга кэлэн, ырыа абылаҥар ылларан, сылайбыттарын барытын умнан кэбиһэллэр, ис туруктарын көннөрүнэллэр.

— Дьэ, бу сыллар тухары туох ситиһиилээххитий?

— Ситиһиилэрбит саҥа тахсан эрэллэр диэххэ сөп. Этэргэ дылы, саҥа тыллар сибэкки кэриэтэ, саҥардыы арыллан, идэтийэн эрэбит. “Ыллыыр Туймаада” куонкуруска гран-при аатын ылбыппыт, 2006 с. норуоттар икки ардыларынааҕы бэстибээлгэ  тиийэн Кытай эмчиттэригэр сүрдээх үчүгэй бырагырааманы көрдөрөн кэлбиппит. Духуобунас киинин иһинэн ыытыллар куорат бары тэрээһиннэригэр көхтөөхтүк кыттабыт.

Куорат киһитигэр, ордук эмчиккэ бириэмэ тиийбэт буолааччы дии. Эһиги хайдах быыс булан дьарыктанаҕыт?

— Дьэ, чахчы бириэмэ тиийбэт. Быраастарбыт элбэх үлэлээхтэрин таһынан, улуустарга командировкаларга үгүстүк сылдьаллар. Ол эрэн, киһи баҕарар, дууһата ырыаҕа тардыһар буоллаҕына, хайдах эмэ гынан, барытын сааһыланан, былааннаан, бириэмэ була сатыыр. Биһиги бары ыал ийэлэрэбит-аҕаларабыт, эбэлэрэбит-эһэлэрэбит. Дьиэ кэргэмитигэр эмиэ болҕомто ууруллуон наада. Ол эрээри сөбүлүүр дьарыкпытыгар кэлэ турабыт. Нэдиэлэҕэ иккитэ култуура колледжыгар дьарыктанабыт.

Салайааччыбыт Людмила Анатольевна Шумилова диэн. Кини бастакы салайааччыбыт Надежда Владиславовна Галецкая суорума суолламмытын кэннэ кэлбитэ. Биһиги онно олус курутуйбуппут, арааһа, хорбут уурайар буолла быһыылаах диэн санаарҕаабыппыт. Профсойуустар биһигини өйдөөн, өйөөн, Людмила Анатольевнаны анаабыттарыгар олус махтанабыт. Күн бүгүнүгэр 20 сылбытын бэлиэтээри олорон, биһигини өйүүр профсойууспутугар махталбытын тиэрдэбит.

Репертуарбыт олус киэҥ. Норуот ырыаларыттан саҕалаан, классикаҕа, сахалыы мелодистар ырыаларыгар тиийэ. Аан бастаан гран-при ылбыт ырыабытынан “Амурские волны” буолар. Композитордар Свиридов, Бабаджанян ырыаларын ыллыыбыт. Урут хорга ити ырыалар хайдах иһиллэллэрин да өйдөөбөт буоллахпытына, билигин наһаа үчүгэйдик ылынабыт. Истэргэ олус кэрэ эбит.

Ону тэҥэ Людмила Анатольевна саха дьонугар духуобунай ырыалары киллэрдэ.  Духуобунай ырыалартан олус сынньанабыт, ол кэнниттэн дууһалыын ырааһыран, чэпчээн барабыт. Өссө да өр хорбутугар ыллыы сылдьыбыт киһи диэн баҕалаахпыт.

Биһиэхэ аан бастакыттан, сүүрбэччэ сылы быһа сылдьар бэтэрээннэр бааллар: Полина Бугаева, Кондратий Афанасьев, кэргэннии Комиссаровтар, Анатолий Потапов, Татьяна Суздалова, Ганна Григорьева, уо.д.а.

Сүрүннээн 4 куоласка арааран ыллыыбыт. Эр дьоҥҥо бас, баритон, тенор куоластар бары бааллар. Киэн туттар баритоммут – “Суһал көмөҕө” үлэлиир биэлсэр Терентий Иванов, бас куоластарбыт — Анатолий Потапов, Анатолий Комиссаров олус үчүгэйдик ыллыыллар. Идэтийбэтэх, музыкальнай грамотаны билбэт дьоҥҥо нотанан ыллыыр бу олус сыралаах, уустук, элбэх үлэттэн тахсар. Ол эрэн, сүрэх баҕатынан, дууһа тардыһарынан, сөбүлүүр дьарыкпытын сайыннара сылдьарбытынан дьоллоохпут.

0
0
Тутаах тыллар
17 января 17.01
  • -48°
  • $ 73,82
  • 83,32