24 От ыйа 24.07
  • 24°
  • $ 87,3
  • 95,46

Элгээйилэр "Арассыыйа улуу ааттара" бырайыакка кытталлар

14:04, 30 ноября 2018
Текст:
Читайте нас на
Яндекс Новости
ЯДВ

«Арассыыйа улуу ааттара» бырайыак сотору түмүктэниэ. Өрөспүүбүлүкэбит киин аэропорда ким аатын сүгүөй? Сунтаар Элгээйитин олохтоохторо санааларын үллэстэллэр. 


Дьокуускай авиапордугар ким аатын иҥэрэбит диэн ыйытыыга сунтаардар санаалара атын-атын буолла. Элгээйи олохтоохторо Ойуунускайга, да Кузьмиҥҥа да тэҥинэн охтоллор.

Элгээйи нэһилиэгин олохтооҕо, музыкальнай оскуола завхоһа Юрий Солдаткин:

— Киин аэропортпут саханы саха дэппит улуу киһибит П.А.Ойуунускай аатын сүгэрэ киэн туттуулаах, хайҕаллаах буолуо этэ.

ЭРМЭЦ музей үлэһитэ Николай Егоров:

— Дьокуускай аэропордугар Социалистическэй Үлэ Дьоруойа, саха норуотун бастакы лүөччүгэ Валерий Кузьмин аатын иҥэрэллэрэ буоллар, үүнэн эрэр ыччаппыт устуоруйаҕа хаалбыт дьоммутунан киэн тутта, өйдүү да сылдьыа этэ. Онон мин Кузьмины талабын.

Айылҕа мусуойун суоппара Петр Карташов:

— Оттон, мин санаабар, биир улахан бэлитиичэскэй диэйэтэл, киэн туттар киһибит, Сахабыт биир чулуу киһитэ — бастакы бэрэсидьиэнэ Михаил Николаев аата ордук диэн саныыбын.

Сунтаар нэһилиэгин олохтооҕо, икки оҕо ийэтэ Айталина Ефремова:

— Сахалар улуу, киэн туттар киһибит П.А. Ойуунускайы бары ытыктыыбыт. Саха академическэй тыйаатыра кини аатын сүгэр. Онон мин тус бэйэм санаам диэн, киин куораппыт аэропордугар Саха сирин бастакы авиатора, лүөччүгэ Валерий Кузьмин аатын биэрэллэрэ буоллар быдан ордук буолуо этэ.

Оҕо саадын үлэһитэ Виолетта Петрова:

— Мин санаабар, аэропортка сыһыаннаах киһи аата иҥэриллэрэ ордук. Бу бырайыак баар буолан, мин Саха сиригэр аан бастакы лүөччүк Валерий Ильич Кузьмин диэн буоларын саҥа биллим. Дьон, кэнэҕэски ыччат устуоруйаны билиэхтээх. Онон аэропорт Кузьмин аатынан буолара буоллар диэн баҕа санаалаахпын.

Ааптар: «Сунтаар сонуннара»

Следите за самым важным и интересным в Telegram-канале и WhatsApp-группе ЯСИА