20 От ыйа 20.07
  • 17°
  • $ 88,02
  • 96,04

Элгээйи нэһилиэгэр Герасим Гурьев аатынан волейбол күрэҕэ буолан ааста

10:01, 10 апреля 2023
Текст:
Читайте нас на
Яндекс Новости
ЯДВ

Быйыл Россияҕа Педагог уонна Аҕа сүбэһит, Саха сиригэр физкультурнай хамсааһын 100 сылынан муус устар 8 күнүгэр Элгээйи нэһилиэгэр үгэскэ кубулуйбут Герасим Гурьев аатынан волейбол күрэҕэ үрдүк таһымнаахтык ыытылынна. Гурьев Герасим Семенович уһулуччу талааннаах учуутал, тренер, саха национальнай атах оонньууларын спортка маастара, республикаҕа «Куобах» ыстаныы рекордсмена, Саха сирин волейболга сборнай хамаандатын чилиэнэ этэ, бу күрэхтэһии 2004 сылтан 2 сылга биирдэ ыытыллар.

Күрэхпитигэр Миирнэйтэн 2 хамаанда, Ньурбаттан 1 хамаанда, Сунтаар улууһуттан Хоро, Кутана уонна Элгээйи, уопсайа 6 хамаанда кыттыыны ылла. Хамаандалары барыларын күөн көрүһүннэрэр сыалтан круговой системанан Элгээйи орто оскуолатын спортсаалатыгар ыыттыбыт. Күрэхпит кылаабынай судьуйата Попов Олег Августинович, кылаабынай секретаря Егоров Прокопий Митрофанович. Оскуолабыт кыргыттара Захарова Нарыйа, Прокопьева Алина, Николаева Дайаана секретарьга күүс-көмө буоллулар. Күрэхпит сэргэхтик ааһарыгар саҥа сүрэхтэммит комментатор Тойбохойтон Данилов Алексей хас биирдии волейболиһы билиһиннэрэн, чахчы да бэйэтэ талааннаах волейболист буолан, бэрт сэргэхтик ыытта.

Сэрэбиэй түмүгүнэн олохтоох Элгээйи хамаандата хара маҥнайгыттан икки Мииринэй күүстээх  хамаандаларыгар түбэһэн, кыһыылаахтык хотторон, көрөөччүлэр, ыалдьааччылар сонньуйан ыллыбыт. Онтон утуу-субуу Хоро, Ньурба хамаандаларын хотоннор, бүтэһигэр Кутана оскуола оҕолорун хамаандатын кытта араа-бараа түсүһэн, кыайан үһүс миэстэни ылары ситистилэр.

Саамай бүтэһик оонньуу чахчы да чаҕылхай финал буолан биэрдэ — Мииринэй уонна МРТК хамаандалара күөн көрүстүлэр. Дьэ абытай подачалаах, күүстээх быһыылаах нуучча-саха боотурдара, икки тэҥ хамаанда эрийсиилээх оонньуута буолла. Бастакы партияҕа субуруччу 5 очкуону Мииринэй хамаандатын хапытаана күүстээх силовой подачанан волейболистар тылларынан «Эйс» ылла. Дьэ ол кэннэ МРТК хамаандата хомуллан, туох кыһыытай-абатай диэн туран бэркэ утарыта охсуулаан, блоктаан бастакы партия кыайыылааҕа буолла. МРТК хамаандатыгар 8 уонна 1 ньүөмэрдээх эдэр нуучча уолаттара, оҕолоро бэркэ быстылар, хамаандаларын инники күөҥҥэ таһаардылар. Иккис партияҕа Миирнэйдэр өссө биир күүстээх 6 ньүөмэрдээх оонньооччуларын таһаардылар. Ону таһынан 8, 5 ньүөмэрдээх оонньооччулара күүстээх быһыыларынан иккис партияны ыллылар. Дьэ күүтүүлээх быһаарыылаах үһүс партия буолар буолла диэн көрөөччүлэр бары тыыммаппыт даҕаны.

Эппиэттээх оонньууга Иванов Владимир, улууспут оҕолорго волейболга тренера, опыттаах волейболист, бэйэтин кэмигэр республика СахаВа «Бастыҥ оонньооччута», бэйэтэ судьуйалаата.

Комментатор Алексей Данилов уутугар-хаарыгар киирэн, нууччалаан-сахалаан күүстээхтэр ааттарын ааттаталаан, сорох оонньооччуларбыт саха диэбиппит тувиннар иҥин буолан биэрдилэр. Дьэ тыҥааһыннаах киирсии түмүгэр Миирнэй хамаандата бастыыры ситистэ. Көрөөччүлэр үксүлэрэ тоҕо эрэ МРТК хамаандатыгар ыалдьа олордубут быһыылаах.

Күрэхпит түмүктэнэн, анал ааттары тэрийээччилэр быһааран, спонсордар элбэх да бириис туруоран үөрүүлээх быһыыга-майгыга туттарылынна. Ол курдук, 1 миэстэни ылбыт Миирнэй хамаандатыгар хас биирдии кыттааччыга хаас мончууктара (спонсор олохтоох дьаһалта), сыаналаах оригинал волейбол мээчигэ (спонсор «Трамплин» маҕаһыын) уонна 5000 солк (спонсор Львов Василий Михайлович) уу харчынан, иккис миэстэлээх МРТК хамаандатыгар кус мончууктара, сыаналаах оригинал волейбол мээчигэ уонна үһүс миэстэлээх Элгээйи хамаандатыгар кус мончууктарын уонна Сунтаар «Булчут» маҕаһыыныгар 8000 солк сертификат (спонсор Попов Семен Валерьевич) туттардылар. Ону таһынан Хоро хамаандатын бастыҥ оонньооччутугар Саян Ивановка (спонсордар Ким Ю.М., ИП Степанова О.А.), Ньурба хамаандатын бастыҥ оонньооччутугар Марк Петровка (спонсор Элгээйи оҕо искусствотын оскуолата) уонна оскуола оҕолоругар «Эдэр кэскиллээх оонньооччу» анал ааттары Күндэйэттэн Федоров Димаҕа (спонсор Попова Ульяна Дмитриевна), Кутанаттан Александров Даниилга (спонсор Элгээйитээҕи Айылҕа түмэлэ), Готовцев Валентиҥҥа (спонсор Элгээйитээҕи Айылҕа түмэлэ) уонна Элгээйиттэн Иванов Вадимҥа (спонсор Элгээйи орто оскуолата), Иванов Серафимҥа (спонсор Элгээйи орто оскуолата) анал бириистэри туттардылар. Оонньуу түмүгүнэн «Бастыҥ оонньооччу» ааты Казарин Александр, Миирнэй хамаандата иккис төгүлүн ылыан ылла уонна Герасим Гурьев аймахтара туруорбут сыаналаах айфон чаһытынан наҕараадаланна. «Бастыҥ быһааччы» анал ааты Бахтин Евгений, МРТК хамаандата ылла уонна точильнай станогунан (спонсор «Татыйыына» маҕаһыын) наҕараадаланна. «Бастыҥ туруорааччы» ааты Иванов Владимир, Элгээйи хамаандата ылла уонна перфораторынан наҕараадаланна (спонсор «Татыйыына» маҕаһыын),  «Бастыҥ көмүскээччи» анал ааты Львов Яков, Элгээйи хамаандата ылла уонна «Альянс» транспортнай хампаанньа туруорбут бирииһинэн наҕараадаланна.

Күрэх үрдүк таһымнаахтык ыытылларыгар күүс-көмө буолбут спонсордарга, тэрийээччилэргэ, спорт ветераннарыгар Юрий Муксуновичка, Юрий Ивановичка, эдэр-эрчимнээх комментаторга Данилов Алексейга тэрийээччилэр ааттарыттан махтал суруктары уонна өйдөбүнньүк бэлэхтэри (спонсордар Постников Афанасий Васильевич, «Корона» маҕаһыын, Элгээйитээҕи быраас амбулаторията) туттардылар. Инникитин да икки сылга биирдэ ыытыллар күрэхпитигэр элбэх күүстээх хамаанда кэлэн күөн көрсөн, үрдүк таһымнаахтык ааһыаҕа диэн эрэнэбит.

Ааптар: Анна Иванова.

Хаартска: Анжелика Никифирова.

Следите за самым важным и интересным в Telegram-канале и WhatsApp-группе ЯСИА