Элбэх оҕолоох ыалга сири дьиэ туттар эрэ буоллахтарына биэрэргэ этии киллэрдилэр, өскө учаастагы атын сыалга тутуннахтарына былдьаныахтарын сөп. Бу сокуон барылын Госдума сааскы сессия биир пленарнай мунньаҕын бастакы ааҕыытыгар көрөргө былаанныыр, диэн Парламентская газета иһитиннэрэр.
Докумуону Курган уобалаһын депутаттара оҥордулар. Кинилэр сир кодексыгар уларытыылары киллэрэргэ уонна элбэх оҕолоохторго учаастактары биэрии бэрээдэгин чуолкайдыырга этии киллэрдилэр. Билигин үс уонна онтон тахса оҕону иитэр-үөрэтэр дьон судаарыстыба эбэтэр муниципалитет бас билиитигэр баар сири босхо ылыахтарын сөп. 2011 сылтан 2017 диэри 304 тыһыынча элбэх оҕолоох ыалга сир бэриллибит диэн, сокуон барылыгар быһааран суруйбуттар.
Ол эрээри, инициатива ааптардара бэлиэтииллэринэн, элбэх оҕолоох дьон ити учаастактары үгүс өттүгэр туһамматтар эбэтэр тута атыылыыллар. Дьиэ-уот кыһалҕата маннык ыалларга быһаарыллыбакка хаалар, оттон сир эргиириттэн тахсан хаалар. Итинэн сибээстээн депутаттар олорор дьиэ тутуутугар эрэ сири биэрэргэ этии киллэрдилэр. Алта сыл устатыгар дьиэ тутуллан бүттэҕинэ, учаастагы бас билиигэ биэрэллэр. Суох буоллаҕына, судаарыстыба учаастагы төттөрү ылыаҕа.
