Сөбүлэһии чэрчитинэн «Экспресс-АТ3», «Экспресс-АТ4» уонна «Экспресс-АМУ8» космос аппарааттара оҥоһуллуохтара, кинилэр Арассыыйа иһигэр тэлэбиидэнньэ, араадьыйа уонна сибээс өҥөлөрүн хааччыйыахтара. Уһук Илиҥҥэ «Экспресс-АМУ51» уонна «Экспресс-АМУ52» спутниктар улахан суолталаахтар, кинилэр 140 кыраадыстаах орбитальнай позицияҕа үлэлиэхтэрэ.
Киэҥ сирдээх-уоттаах, ыраах сытар нэһилиэнньэлэрдээх Саха сиригэр спутниковай сибээһи сайыннарыы цифровой инфраструктураны хааччыйыыга сүрүн факторынан буолар. Геостационарнай спутниктар сир үрдүнээҕи ситими тардарга уустук эбэтэр экономическай өттүнэн табыгаһа суох оройуоннарга интэриниэти, суотабай сибээһи хааччыйаллар.
Саҥа спутниктары 2030 сылга диэри орбитаҕа таһааран үлэҕэ киллэрэр былааннаахтар. Кинилэр үлэлиир болдьохторо 15 сылтан итэҕэһэ суох буолуоҕа, ол телекоммуникационнай өҥөлөр туруктаах буолууларын хааччыйыаҕа.
Сиһилии: https://www.sakha.gov.ru/news/43360
