Саха сирин норуодунай суруйааччыта, СӨ култууратын үтүөлээх үлэһитэ, П.А.Ойуунускай аатынан Судаарыстыбаннай бириэмийэ лауреата, Томпо улууһун бочуоттаах гражданина, прозаик уонна публицист Егор Неймохов 29 сыл олорбут уонна үлэлээбит дьиэтигэр (Кальвица уул. 9/1.) өйдөбүнньүк дуоска туруорулунна.
Өйдөбүнньүк дуосканы үөрүүлээхтик аһыы сиэригэр-туомугар СӨ Судаарыстыбаннай Мунньаҕын (Ил Түмэн) дьокутааттара, суруйааччылар, суруйааччы аймахтара, доҕотторо кытыннылар. Өрөспүүбүлүкэ бастакы вице-премьерин э.т. Юрий Куприянов эҕэрдэ тэлэгирээмэтэ ааҕылынна.
Суруйааччы олоҕун аргыһа, кини аатын үйэтитиигэ элбэх үлэни ыытар Мария Неймохова: «Өйдөбүнньүк дуоска бу дьиэҕэ туруоруллубута мээнэҕэ буолбатах. Манна биһиги оҕолорбут төрөөбүттэрэ уонна улааппыттара, кэргэним айымньылара үксэ манна суруллубуттара.
Кини айымньытынан туруоруллубут «Мой убийца» киинэ Арассыыйаҕа прокакка тахсан, бэҕэһээ дойду тэбэр сүрэҕэр аан бастаан көрдөрүлүннэ, онтон бүгүн, Сомоҕолоһуу күнүгэр, өйдөбүнньүк дуоска баар буолла. Арассыыйаҕа Литэрэтиирэ сылыгар Е.Неймохов үс айымньыта бэчээккэ тахсыбыта итиэннэ Сэбиэскэй Сойуус Дьоруойа Федор Охлопков туһунан пьесата Дьокуускай к. баһылыгын бириэмийэтигэр тиксибитэ олус кэрэхсэбиллээх.
Кэргэним мөссүөнүн үйэтиппит Саха сирин норуодунай худуоһунньуга, Егор Петрович доҕоро, биир дойдулааҕа Максим Павловка, СӨ Ил Дарханыгар, бырабыыталыстыбатыгар, кэргэним доҕотторугар, суруйааччыларга дириҥ ытыктабылым ананар», – диэн бүгүн Егор Неймохов сырдык аатын үйэтитиигэ мустубут дьоҥҥо ис сүрэҕиттэн махтанна.
СӨ култуураҕа уонна духуобунай сайдыыга миниистирин солбуйааччы Владислав Левочкин эҕэрдэ тылыгар норуодунай суруйааччы Е.Неймохов саха уонна Арассыыйа литэрэтиирэтигэр биллэр-көстөр суолу хаалларбытын бэлиэтээтэ. Суруйааччы искусство араас көрүнэр, ол иһигэр тыйаатырга уонна киинэҕэ, бэйэтин кылаатын киллэрдэ. Айымньылара киинэҕэ, литэрэтиирэҕэ саҥа холонор эдэр дьоҥҥо үтүө холобуру көрдөрөллөр, айарга-тутарга көҕүлүүллэр, саха литэрэтиирэтэ салгыы сайдарыгар олук уураллар.
«Саха литэрэтиирин улахан доҕоро, бэйиэт Евгений Каминскай суруйааччы «Алампа» арамаанын тылбаастаан, киэҥ араҥаҕа таһаарда. Онон, Егор Петрович суруйуулара өрүүтүн тыыннаахтар уонна саха дьоно баарын тухары биһиги киэн туттуохпут. Кини айымньылара ыччаты иитэргэ, сахалар улуу дьонноох этибит диэн өйдөбүл үөскүүрүгэр тирэх буолаллар», – диэн Олег Сидоров санаатын тириэртэ.
Бу күн үгүс үтүө тыл этилиннэ, истиҥник ахтан-санаан аастылар.
СӨ норуодунай бэйиэтэ Иван Мигалкин эппитинии, Егор Петрович айымньылара саха дьонугар элбэҕи биллэриэхтэрэ, олоҕу таптыырга дьулууру үөскэтиэхтэрэ, билиини ыларга, кырдьык туһугар туруулаһан кэпсэтиигэ ыҥыра туруохтара. Ханнык баҕарар саха оҕото ийэтин сылаас алаадьытын үөрэ-көтө амсайарын, ахтарын курдук, кини айымньылара өрүү ахтылҕаннаахтар. Тыл күүһэ айылҕа күүһүн кытта тэҥ суолталаах. Айылҕа олус күүстээх, онтон чулуу айымньы эмиэ олус күүстээх. Күүстээх хаһан баҕарар бэйэтин тула дьону тардар, күүстээх санаалар дьону сомоҕолууллар, күүстээх санаалар олохпут хайдах буолуохтааҕын билгэһиттэрэ буолаллар.
ЫСПЫРААПКА:
Е.Неймохов 1950 с. кулун тутар 30 күнүгэр Томпо оройуонун Мэҥэ Алдан с. төрөөбүтэ. «Сэргэлээххэ сааскы күн» бастакы кэпсээнэ 1975 с. «Эдэр коммунист» хаһыакка бэчээттэммитэ.
«Хапсыһыы», «Көтүү», «Сайсары күөлгэ түбэлтэ», «Хаһыы» айымньыларынан Саха академическай тыйаатырыгар уонна өрөспүүбүлүкэ норуодунай тыйаатырдарыгар испэктээкиллэр туруоруллубуттара. «Сыл түөрт кэмэ», «Хара мааска», «Ильмень үрдүнэн туруйалар», «Быһах биитинэн», «Алампа» улахан айымньылара ааҕааччы сэҥээриитин ылбыттара. «Хара мааска», «Ильмень үрдүнэн туруйалар», «Сайсары күөлгэ түбэлтэ» айымньыларынан толору кээмэйдээх киинэлэр уһуллубуттара. «Хара мааска» Москваҕа детективтээх киинэлэр аан дойдутааҕы фестивалларыгар алта номинант иһигэр киирбитэ. «Ильмень үрдүнэн туруйалар» киинэ П.А.Ойуунускай аатынан Судаарыстыбаннай бириэмийэни ылбыта. «Мой убийца» Лос-Анджлеска киинэ аан дойдутааҕы фестивалыгар көрдөрүллүбүтэ, номинацияҕа түһэриллибитэ.
