Егор Кампеев: “Мин ырыа кэһиилээх кэлиэҕим”

Покровскай куорат  “Саргы түһүлгэтэ” култуура  киинигэр баар суох ытыктыыр, дьоһун киһибит Саха Өрөспүүбүлүкэтин култууратын үтүөлээх үлэһитэ, Арассыыйа уонна Саха Өрөспүүбүлүкэтин туйгуна, самодеятельнай композитор, Дархан оһуохайдьыт, алгысчыт Егор Степанович Кампеев үбүлүөйдээх сылыгар анаан “Мин ырыа кэһиилээх кэлиэҕим” аһаҕас өрөспүбүлүкэтээҕи ырыа күрэһэ бэрт сэргэхтик, үрдүк таһымнаахтык ааста.

Күрэс кыттыылаахтара балаһыанньа ирдэбилинэн биир ырыалара Е.С. Кампеев  ырыатын толоруу, иккис ырыалара көҥүл.

Бу күн күрэскэ кыттыыны ыллылар: Хаҥаластан – Өктөмтөн Фоминнар дьиэ кэргэнэ, Нөмүгүттэн “Тирэх”, “Талба”, Пелагея Семенова, Төхтүртэн Николай Макаров, Хоточчуттан Петр Пестеров, Покровскай куораттан “Дьулуур”, Дмитрий Ющенко, Мохсоҕоллоохтон “Иһирэх” дьахталлар ансаамбыла, Таатта улууһуттан, Уус-Таатта сэлиэнньэтиттэн Марфа Тарабукина, Чурапчы улууһуттан Чакыртан Елена Сивцева, Дириҥтэн ”Алаас кыргыттара” дьахталлар ансаамбыла.

Дьүүллүүр сүбэҕэ үлэлээтилэр: Саха Өрөспүүбүлүкэтин норуодунай артыыһа, ырыа айааччылар Союһун бэрэссэдээтэлэ Алексей Васильевич Егоров – дьүүллүүр сүбэ бэрэссэдээтэлэ. Саха Өрөспүүбүлүкэтин култууратын үтүөлээх үлэһитэ, Саха сирин биллиилээх мелодииһа Степан Иванович Васильев. Покровскай куорат оҕо ускуустубатын уһуйааччыта, Саха Өрөспүүбүлүкэтин бочуоттаах үлэһитэ Людмила Степановна Артамонова. Хотугулуу Илиҥҥи Федеральнай Университет үп–экономика институтун преподователэ, Егор Степанов төрөппүт кыыһа Елена Егоровна Кампеева. Хаҥалас улууһун “Арчы Дьиэтэ” норуот айымньытын киинин салайааччыта, Саха Өрөспүүбүлүкэтин култууратын үтүөлээх үлэһитэ Лидия Васильевна Харитонова.

Күрэс түмүгүнэн кыайыылаахтарынан ааттаннылар:

Бастакы үктэл – “Талба” дьахталлар ансаамбыла (салайааччы Юлия Попова), Ой.

Иккис үктэл – Анатолий Гуляев, Орто-Халыма.

Үһүс үктэл – Дмитрий Ющенко, Покровскай куорат.

Бастакы үрдэл — Пелагея Семенова, Ой.

Иккис үрдэл – Петр Пестеров, Хоточчу.

Үһүс үрдэл – Фоминнар дьиэ кэргэн, Өктөм.

Кылаан-чыпчаал — “Алаас кыргыттара”, Чурапчы Дириҥиттэн (салайааччы Фекла Попова).

Күөн күрэс гала-кэнсиэринэн түмүктэннэ, бу күн ылбаҕай ырыаларынан кэнсиэри киэргэттилэр Степан Васильев, Егор Кампеев кыыһа Елена Кампеева, “Эркээни эдэр сааһа” народнай үҥкүү коллектива, күрэһи уонна кэнсиэри иилээн-саҕалаан ыытта Хаҥалас “Арчы Дьиэтэ” норуот айымньытын киинин үлэһитэ Просковья Лебедева, сценарийы суруйан бэлэмнээтэ Мотрена Гаврильева.

Кэлбит дьон кэнсиэри астына – дуоһуйа көрдүлэр, тэрийээччилэргэ барҕа махтал тылларын эттилэр.

Сүрүн бирииһи Е.С.Кампеев дьиэ кэргэнэ 25 000 солкуобайы уу харчынан туттардылар, култуурабыт салалтата, “Арчы Дьиэтэ” сертификат туттардылар, бу тэрээһиҥҥэ спонсордаан көмөлөстүлэр: Покровскай дьаһалтата, Е.С.Кампеев өр сылларга үлэлээбит тэрилтэлэрэ Покровскай 1, 2 нүөмэрдээх оскуолалара, Хаҥалас улууһун  Г.В.Ксенафонтов аатынан кыраайы үөрэтэр түмэлэ.

Кыттыбыт дьоҥҥо Кампеевтар ааттарыттан махтал суруктары туттардылар, Е.С.Кампеев олоҕун аргыһа, Хаҥалас улууһун бочуоттаах олохтооҕо  Зинаида Иннокентьевна Кампеева анал тус бириистэрин  Фоминнар дьиэ кэргэнигэр уонна Пелагея Семеноваҕа  истиҥник махтанан туран туттарда.

Күрэс кыттыылаахтара бу тэрээһиҥҥэ кэлэн кыттыбыттарыттан астынан-дуоһуйан тарҕастылар.

Дьүүллүүр сүбэҕэ идэлээх дьон үлэлээн күөн – күрэс таһыма олус ирдэбиллээхтик ааста, түгэнинэн туһанан, ыҥырыыбытын ылынан кэлбит дьоһун дьоммутугар тэрийэр бөлөх ааттарыттан барҕа махталбытын этэбит.

Түмүктээн эттэххэ, Егор Степанович Кампеев, тыыннааҕа буоллар, 2024 сыл ыам ыйын 24 күнүгэр 85 сааһын  туолуохтаах этэ. Үбүлүөйдээх сылын чэрчитинэн 2024 сылга өрөспүүбүлүкэбитигэр Оһуокай күнүн бэлиэтээн, улууспутугар кини аатынан эр дьоҥҥо анаан оһуокай күрэһин ыыппыппыт. Бу күрэс  былаанынан ахсынньы ыйга буолуохтааҕын кэккэ биричиинэнэн көһөн бу күн оҥордубут.

Ытык киһибит үтүө аатын өрө тутаммыт, кини аатын үйэтитэр, ылбаҕай ырыаларын дьоҥҥо – сэргэҕэ тарҕатар туһуттан  маннык тэрээһиннэри үбүлүөйдээх бэлиэ сылларыгар ыытан сайыннаран, үтүө  аатын ааттатан үүнэр көлүөнэ ыччаты дойдуга бэриниилээх буолууга иитэн таһаарарга, олус бэртээхэй бырайыак, инникитин бу кэнсиэри көрөн баран Пелагея Семенова толорбут Леонид Попов тылыгар суруйбут Егор Кампеев “Урааҥхайдыы Уруй!” ырыатын Кыайыы сылыгар анаан Эркээни ыһыаҕар улуус түмүллүбүт хора толоруутугар ыллаппыт киһи диэн санаа киирдэ.

Ааптар: Лидия Харитонова