Ил Дархан Егор Борисов бүгүн сарсыардаттан ветеран Прокопий Прокопьевич Березиҥҥэ ыалдьыттаата. Инстаграмҥа бэйэтин страницатыгар ол туһунан кэпсээбит.
Прокопий Березин Томпо оройуонун Кириэс Халдьаайытыгар күн сирин көрбүт. Сүүрбэлээх эрэ эдэркээн уол Балтийскай флокка сулууспалаабыт, Ленинград блокадатыгар сэриилэспит, онтон куораты босхолоспут. Кэлин Амурскай флотилияҕа дьоппуон сэриитигэр кыттыбыт. Уоттаах сэрии кэнниттэн пароход капитанынан үлэлээбит.
«Сотору Прокопий Прокопьевич 95 сааһын бэлиэтиэҕэ. Кини аламаҕай, ис-киирбэх, олоҕу таптыыр киһи. Чөл олох политикатын өйүүр, сиэннэрин уонна оҕолорун ситиһиилэринэн киэн туттар. Кыайыыны уһансыбыт албан ааттаах үтүө дьоммутугар уруй-айхал! Саха сирин бары олохтоохторун Улуу Кыайыы Күнүнэн ис сүрэхтэн эҕэрдэлиибин!» — диэн Егор Борисов Инстаграмҥа суруйбут .
