Саха сиригэр от үлэтэ түмүктэнэрэ ыйтан аҕыйах кэм хаалла. Быйылгы оттооһуҥҥа күн-дьыл туруга улахан мэһэйи оҥордо. От ситэри үүмэккэ, хаһаайыстыбалар үгүстэрэ от ыйын ортотуттан окко киирбиттэрэ. Сорох улуустарга тоҥоруу, күүстээх ардахтар кэннилэриттэн оттуур сирдэр ууга былдьаммыттара. Маныаха бэйэтин санаатын өрөспүүбүлүкэ баһылыга Егор Борисов Instagram балаһатыгар суруйда.
Хоту улуустарга оттооһуҥҥа улахан кыһалҕа үөскээбитэ биллэр. Былаас уоргана маныаха суһаллык быһаарыылары ылар. Тыа хаһаайыстыбатын уонна ас-үөл бэлиитикэтин миниистирин солбуйааччы Афанасий Семенов Арктика оройуоннара ото суох хаалбаттарын туһунан этэр.
«Оттуурга быйылгы сайын уустук буолла. Киин улуустарга оттуур сирдэр ууга былдьаннылар, оттон хоту уу элбээһинэ дьон окко киириитин мэһэйдээтэ. Быһыыны-майгыны кыраҕытык хонтуруоллуубут, ол эрээри атын миэрэлэр наадалар», — диэн Егор Борисов суруйар.
Кини суруйарынан, тутуу этэрээттэрин байыастарын ыраах сытар улуустарга от үлэтигэр ыытарга, кинилэри уматыгынан, тиэхиньикэнэн хааччыйарга сорудахтаабытын, ону таһынан эмсэҕэлээбит улуустарга оту, силлэһи уонна аһылыкка туттулар тууһу тиэрдэр наадатын эттэ.
«Күүһү холбуурга биһиги сыалбыт-сорукпут түмүллэр!» — диэтэ Борисов.
