18 От ыйа 18.07
  • 18°
  • $ 88,09
  • 96,3

Егор Борисов: Нэһилиэнньэ коррупция туһунан дьиҥнээх иһитиннэриилэри билиэхтээх

11:26, 13 июля 2016
Читайте нас на
Яндекс Новости
ЯДВ

Өрөспүүбүлүкэ баһылыгын иһинэн коррупцияны утары үлэлиир хамыыһыйа мунньаҕар уопсастыба ортотугар коррупция хайа баҕарар көстүүлэригэр утары санаа үөскүүрэ көрдөрөр-иһитиннэрэр тиһиктэртэн тутулуктааҕын, ол иһин бу тиһиктэр нөҥүө иһитиннэриилэри киэҥник хабан тарҕатар наадалааҕын Егор Борисов эттэ.


«РФ президенин ИДьМ уурааҕынан дуоһунастаах сирэйгэ (сакаасчыкка) бэдэрээччит сокуоннайа суохтук үп-харчы биэриитин утары үлэлиир сорук турар», — диэн ИДьМ Саха сиринээҕи экономическай өттүнэн куттал суох буолуутун уонна коррупцияны утары управление начальнига Владимир Арбузов эттэ.

«Быйыл биһиги судаарыстыба сакааһын толоруу иһин сакаасчыт бэдэрээччиттэн ураты улахан суумалаах үбү-харчыны сокуоннайа суохтук ылыытыгар икки холуобунай дьыаланы тэрийдибит», — диир кини.

Арбузов этэринэн, үбү-харчыны оҥоруу атын ньымата быйыл биллибит. Ол курдук, Томпо улууһугар 19,3 мөл.солк. суумалаах оҕо садын тутууга ыытыллар куонкуруска икки сайаапка киирбит. Эрдэттэн кэпсэтии быһыытынан электроннай куонкуруска кыттааччыттан биирдэстэрэ күрэстэһии баарын курдук көрдөрөрүн иһин киниэхэ уопсай суума 10% тэҥнээх бэриги модьуйбут. Харчы бэриллибэтэҕинэ, аукциоҥҥа чэпчэки сыананы этиэн туһунан куттаабыт. Үбү-харчыны модьуйааччыга РФ ХК 204 ыст. (бэригинэн коммерческай атыылаһыы) холуобунай дьыала тэриллибит. Билигин бу тула силиэстийэ бара турар.

«Маннык уонна маныаха майгынныыр быраап кэһиллиитин туһунан биир үксүн “араҕас пресса” тиэрдэр. Ити матырыйааллар көрдөрөр-иһитиннэрэр официальнай тиһиктэргэ бэчээттэнэн тахсаллара наадалаах. Оччотугар дьон чопчу быһыыны-майгыны билэрин-көрөрүн, баар чахчыны араастаан токуруппатын туһугар тустаах уорганнаах чуолкай аналитиканы оҥоруохтааххыт», — диэтэ Егор Борисов.

Егор Борисов этиитин быраабы араҥаччылыыр уорганнар өйөөтүлэр. ИДьМ уонна силиэстийэлиир управление үлэһиттэрэ көрдөрөр-иһитиннэрэр тиһиктэри кытта үлэлэрэ күүһүрүөхтээх.

Уопсастыба коррупцияны кытта эйэлэһиэ суохтааҕын, куонкурустар, атыылар дьэҥкэ буолуохтаахтарын, сударыстыбаннай уонна муниципальнай атыылаһыы кииннэниэхтээҕин туһунан Егор Борисов эттэ.

Следите за самым важным и интересным в Telegram-канале и WhatsApp-группе ЯСИА