«Мой убийца» («Сайсары күөлгэ») норуоттар икки ардыларынааҕы «Золотой Глобус» бириэмийэ «Омук бастыҥ киинэтэ» аатыгар киирбитэ. Саха сирин баһылыга Егор Борисов Instagram аккаунугар бу туһунан санаатын үллэстэр.
«Соторутааҕыта «Мой убийца» («Сайсары күөлгэ») киинэ норуоттар икки ардыларынааҕы улахан ааттаах-суоллаах «Золотой глобус» бириэмийэтигэр киириитэ Арассыыйаҕа киинэ сылын кытта сөп түбэстэ. Киинэ кириитиктэр үрдүк сыанабылларын ылбыта үөрдэр», — диир Егор Борисов.
Региоҥҥа сыл аайы араас жаанырдаах 10-12 киинэ уһулларын, итилэртэн сорохторо өрөспүүбүлүкэни, Арассыыйаны уҥуордаан омук дойдуларыгар тиийэ биллэллэр, киинэ араас фестивалларыгар биһирэнэллэр.
«Биллэн турар, ити култуурабытын, тылбытын тарҕатыга, өрөспүүбүлүкэҕэ интэриэс үөскүүрүгэр суолтата улахан. Мин бу киинэни олус сэҥээрбитим, биир тыынынан көрбүтүм. Режиссердар, оператордар бастыҥ үлэлэрэ, артыыстар истиҥ оонньуулара харахха быраҕыллар. Саха сирин киинэтэ Россия кинематограбын инники күөнүгэр сылдьарыттан үөрэбин!» — диэн Ил Дархан суруйар.
This post was published on 14.10.2016 11:51 11:51