18 Тохсунньу 18.01
  • -48°
  • $ 73,82
  • 83,32

Егор Борисов федералларга хаарбах дьиэлэр кыһалҕаларын туруоруста

15:11, 27 января 2017
Текст:

Хаарбах дьиэттэн дьону көһөрүү федеральнай бырагыраама бу сылынан түмүктэниэхтээх. Ил Дархан Егор Борисов бырагыраама салгыы үлэлиириттэн-үлэлээбэтиттэн тутулуга суох, өрөспүүбүлүкэҕэ хаарбах дьиэлэри көтүрүү салҕаныаҕын туһунан эппитэ. Кини Москваҕа сырыытын кэмигэр РФ тутуутун уонна ОДьКХ миниистирин кытары көрсөн кэпсэппитин  туһунан edersaas.ru сырдатта.


Билигин Саха сиригэр бу бырагырааманан туһанан номнуо 20 тыһ. киһи дьиэтин тупсарынна, 240 тыһ. кв м иэннээх дьиэ көһөрүлүннэ. Ыспыраапкаластахха, хаарбах дьиэттэн дьону көһөрүү бырагырааматынан, 2017 с. балаҕан ыйыгар диэри 491,06 тыһ. кв м дьиэ көһөрүллүөхтээх. Бу мантан билигин 261,61 тыһ. кв м дьиэ олоххо киирэрэ хаалла.

Былаан быһыытынан, өссө 10 тыһ. кэриҥэ киһи көһүөхтээх, 4 тыһ. тахса элбэх кыбартыыралаах дьиэ көтүрүллүөхтээх. Улуустарынан ылан көрдөххө, Нерюнгри оройуона саамай элбэх эбийиэги испииһэккэ киллэртэрэн турар. Оттон былааны толорууну ыллахха, Жатай уонна Таатта улууһа дьиэлэрин барытын киллэрэн олороллор. Сунтаар, Томпо, Хаҥалас, Чурапчы улуустара эмиэ былааннарын толорон иһэллэр. Ол оннугар Ньурба, Үөһээ Бүлүү, Чернышевскай, Сангаар бөһүөлэктэр былаантан хаалан иһэллэр.

Үөһэ суруллубут 491,06 тыһ. кв м иэннээх дьиэттэн дьону көһөрүүгэ, уопсайа, 30 млрд солк. (ол иһигэр өрөспүүбүлүкэ бүддьүөтүттэн 16,8 млрд солк.) көрүллүөхтээх этэ. Билиҥҥи туругунан, өрөспүүбүлүкэ итинтэн 22,69 млрд солк. туһанан олорор. Егор Афанасьевич үбүлээһиҥҥэ миниистир Михаил Мень болҕомтотун хатаан, билигин 984,55 мөл. солк. быһаарыллыбакка турарын иһитиннэрдэ. Уонна хаарбах дьиэттэн көһөрүү салгыы хайаатар да ыытыллара наадатын туһунан эттэ.

Манна даҕатан эттэххэ, кэнники дааннайдарынан (ити үөһэ ааттаммыт дьиэлэр бары 2012 с. тохсунньу 1 күнүгэр диэри испииһэктэнэн киирбиттэрэ), өрөспүүбүлүкэҕэ испииһэккэ киирбэккэ хаалбыт 3235 элбэх кыбартыыралаах дьиэ (уопсай иэнэ – 1 мөл. тахса кв м) баара билиннэ. Манна барытыгар 52,4 тыһ. киһи олорор. Бу дьиэлэри көтүрүүгэ 70 млрд солк. наада. Ол иһин Ил Дархан атын регионнары кытары кыттыһан федерация салалтатыгар бырагырааманы уһатарга диэн этии киллэрбитэ. Билигин ити этии үөрэтиллэ сылдьар.

Тутуу миниистирэ Михаил Мень мунньах түмүгэр Саха сиригэр тутууга үгүс өрүттээх үлэ барарын, регион федеральнай бырагыраамаларга хото кыттарын бэлиэтээтэ. Ону таһынан, дьон-сэргэ ипотеканан туһанан дьиэлэрин тупсарыналлара 30 % үрдээбитин эттэ.

0
0
18 января 18.01
  • -48°
  • $ 73,82
  • 83,32