16 От ыйа 16.07
  • 21°
  • $ 87,81
  • 95,78

Егор Борисов алмаас саппааһын хаҥатарга соруйда

14:34, 03 мая 2018
Текст:
Читайте нас на
Яндекс Новости
ЯДВ

Муус устар 28 күнүгэр Егор Борисов Москваҕа үп миниистирэ Антон Силуанов салайан ыыппыт «АЛРОСА» ПАО Кэтээн көрөр Сэбиэтин мунньаҕар кытынна.

Мунньах бэбиэскэтигэр 21 боппу­руос көрүлүннэ. 2017 с. түмүгүнэн хампаанньа сыллааҕы отчуота барыллаан бигэргэннэ. Ааспыт сыл барыһын үллэрэргэ акционердар сыллааҕы уопсай мунньахтарыгар сүбэ-ама бэрилиннэ, маны таһынан, урукку дьылларга түҥэтиллибэтэх барыстары, ол иһигэр дивиденнэри тыырыыны дьүүллэстилэр.

СӨ Ил Дархана Егор Борисов маннык мунньах сүҥкэн суолтатын бэлиэ­тээн туран, сүрүн түмүктэргэ тохтоото: «Былырыын төһө даҕаны кэккэ ыарахаттар уонна кыһалҕа баарын иһин, алмаастаах хампаанньа үп-харчы өттүнэн экономическай көрдөрүүтэ 2016 с. кытта тэҥнээтэххэ, таһыччы ордук. «АЛРОСА» салгыы сайдарыгар алмаас саппааһын хаҥатыы таһынан, бырамыысыланнаска үлэлиир дьон куттала суох буолууну тэри­йиигэ ууруоҕа.

Арассыыйаҕа алмааһы кырыылыыр эйгэ бүтэһик уон сыл иһигэр ыарахаттары көрүстэ, онон, күндү тааһы күлүмүрдүү оонньотор уустар дойду үрдүнэн өйөбүлгэ наадыйаллар. Бу салааны сэргэхситэргэ хам­паанньа бэйэтэ кыттыыны ылар интэ­риэстээх».

Аан дойдуга саамай элбэх алмааһы хостуур «АЛРОСА» хампаанньа 2017 с. түмүгүнэн, 275,4 млрд солк. үбү оҥорбут, онтон ыраас барыс 78,6 млрд солк. тэҥнэспит.

2017 с. Мирнэйгэ «Мир» рудникка саахал тахсан, аҕыс киһи былдьаммыта. Сиртэн хостонор баай уон бырыһыанын биэрэ сыппыт шахта ууга баран, сабыллыбыта. Уопсайа 10,216 млрд солк. хоромньу тахсыбыта.

Аан дойдуга алмааһы улахан баартыйанан атыылаһааччылар Индия уонна Кытай экономическай ыарахаттары көрсөннөр, хампаанньа ааспыт сылы соччото суох түмүктээтэ  Ол эрээри, аан дойдуга алмааһы хостуурга «АЛРОСА-ны» куоһарар ким да суох. Күндү тааска интэриэс уҕараабат, бар дьон күлүмүрдэс киэргэлтэн хараҕын араарбат.

«АЛРОСА-ҕа» саҥа уларыйыылар

Былырыын кулун тутарга алмаастаах хампаанньаҕа «Газпромбаан», «СОГАЗ» уонна «Сбербаан» курдук бөдөҥ хампаанньаларга үлэлээбит эдэр салайааччы Сергей Иванов үс сылга ананан кэлбитэ. Кини салайар аппарааты уларытан баран, «АЛРОСА-ны» саҥа уларыйыылар күүтэллэрин туһунан эппитэ. Ол этиитэ өр күүттэрбэккэ, номнуо олоххо киирэн эрэр. Сотору кэминэн, хампаанньа гаас бырамыысыланнаһыгар баар активтарын аукциоҥҥа таһааран, быһа холоон, 36 млрд солк. атыылыыр былааннаах. Саҥа салалта кэлэн, дивиденд төлөөһүнүн эмиэ уларытар санаалаах, ол эрэн, 2018 с. киирбит дохуоту үллэрии уруккутунан хаалыаҕа.

500 киһини сарбыйыы

Оттон Мирнэйгэ уонна Дьокуускайга АУП үлэһиттэрин ахсаанын, уопсайа 500 киһини «АЛРОСА», «АЛРОСА-Ньурба», «Анаабыр алмаастара» үс тэрилтэҕэ сарбыйыы туһунан эппиттэрэ.

Онон, алмаас ырыынагар тахсар кыра да уларыйыы, сыана, солкуобай халбаҥнааһына өрөспүүбүлүкэ бүддьүөтэ туолуутугар улахан оруоллаах.

Күн бүгүн федеральнай киин таһынан, Сахабыт сиригэр хампаанньа аахсыйатын Баай-дуол министиэристибэтэ 25,0002%, улуус дьаһалталара 8, 0003% тутан олороллор, 33, 9739 % — көҥүл эргимтэҕэ сылдьар.

Марианна Тыртыкова, «Саха сирэ», edersaas.ru

0

0
Следите за самым важным и интересным в Telegram-канале и WhatsApp-группе ЯСИА