Үөһээ Бүлүү улууһугар аҕам саастаахтар декадаларын уонна «Уһун үйэлэнии» улуустааҕы социальнай бырайыак олоххо киириитин туһунан Дьиэ кэргэн уонна эдэр ыччат салаатын салайааччыта Зоя Колосова иһитиннэриитэ буолла.
Санатар буоллахха, алтынньы 1-10 күннэригэр аҕам саастаах дьон декадата сыллата ыытыллар. Маныаха хас биирдии тэрилтэ үлэлээн ааспыт ытыктанар бэйэлэрин бэтэрээннэригэр болҕомто ууралларыгар, соҕотохтуу олорор саастаах дьоҥҥо көмө оҥорорго туһуланар сыаллаах тэрээһиннэр ыытыллалларыгар анаммыт кэрчик кэм буолар.
Алтынньы 1 күнүгэр күнүс 14:00 чаастан «Добрых рук мастерства» быыстапкаттан бу декада саҕаланыаҕа. Олоҥхо дьиэтигэр 15:00 чаастан арыллыы үөрүүлээх тэрээһинэ саҕаланыаҕа.
Бу күн 60-тан үөһэ саастаах дьону улуус киинигэр уонна нэһилиэктэринэн сүүрэр маршрутнай автобустар босхо таһыахтара.
«Уһун үйэлэнии» социальнай хайысхалаах улуус иһинэн үлэтин саҕалыыр бырайыак дойду таһымыгар үлэлиир национальнай бырайыак чэрчитинэн үлэлиэҕэ.
Бу бырайыакка 90 саастарын ааспыт 25 ытык кырдьаҕастан бэйэлэрин бэйэлэрэ көрүнэн, хаһаайыстыбаларын дьаһанан олорор 8 кырдьаҕас киирдэ. Кинилэр олохторун укулаатын көрөн-истэн, кэмиттэн кэмигэр сэргэхситэн, доруобуйаларын туругун кэмигэр чөлүгэр түһэрэллэригэр көмө буолан, ытык саастарыгар этэҥҥэ олороллоругар көмө буолуохтаах бырайыак өр сыллаах үлэни эрэйэр. Мантан сиэттэрэн улууска аҕам саастаах, уһун үйэлээх дьон ахсаана сылтан сыл эбиллэ туралларыгар туһуланыахтаах, суруйда @uoheebuluu
This post was published on 29.09.2025 11:45 11:45