Үөһээ Бүлүү улууһун үөрэҕин салалтата оҕо сынньалаҥын тэрийиигэ ураты болҕомтону уурар. «Трудовой-81» лааҕыры сөргүтүү үлэтэ барбыта. Быйыл «Эһэлээх Маар» лааҕырын тэрийиигэ үөрэх министиэристибэтин күрэҕэр кыттан, 3 мөл 678 тыһ 57 солк ылла.
Урукку өттүгэр «Индом даачата» диэнинэн биллэр территорияны уларыта тутан, «Малая агроакадемия академика Леонида Владимирова» диэн ааттаныаҕа. Манна оҕолорго анаан экспериментальнай былаһаакка тэриллиэҕэ. От мас (ботаническай саад), кыыл-сүөл, көтөр-сүүрэр арааһын улуус оҕолоро үрдүттэн хоно сытан олордорго, иитэргэ үөрэниэхтэрэ, диэн суруйда үөрэх управлениетын салайааччыта Спиридон Борбуев https://www.instagram.com/admvervil/
Кырдьаҕастарбыт сайыҥҥы дьиэлэрэ оҕолорго анаан иккис тыыннанан эрэр. Оччотооҕу «Индом» дириэктэригэр Николай Сергеевич Федотовка махтаналлар. Дьиэни-уоту Исидор Барахап аатынан оскуолаҕа туттарбыттар.
«Бу барыта улууспут баһылыга Владимир Семенович Поскачин уонна Ил Түмэҥҥэ дьокутааппыт Феодосия Васильевна Габышева быыбар иннинээҕи бырагыраамаларын толоруутун чэрчитинэн, кинилэр өйөбүллэринэн тэриллэр. 2019 сыллаахха улуус баһылыгын солбуйааччыта Люция Спиридоновна Тойтонова салалтатынан улуус делегацията Ялтаҕа «Артек» лааҕырга бүтүн Россиятааҕы оҕолор сынньалаҥнарын тэрийии форумугар атын регионнар холобурдарын билсэн кэлэн, улууска оҕо сынньалаҥар болҕомто уурарга сорук туруоруммута», — диир салайааччы.
