Үөһээ Бүлүү улууһун предпринимателлэрэ, медицина бочуоттаах бэтэрээнэ Татьяна Ивановна Агаева төрөппүт кыргыттара, сиэнэ киин балыыһа коронавируһу кытта охсуһарыгар анаан уу харчынан көмөлөстүлэр. Билигин киирбит үбүнэн балыыһа отделениеларыгар хаһаайыстыбаннай мал, дезинфекциялыыр сириэстибэлэр ылылыннылар.
Үтүө санаалаах предпринимателлэр Саха Өрөспүүбүлүкэтин доруобуйатын харыстабылын туйгуна, Үөһээ Бүлүүтээҕи кииннэммит балыыһа бочуоттаах бэтэрээнэ, эмп эйгэтигэр олоҕун анаабыт, улаханнык ытыктанар киһи Татьяна Ивановна Агаева төрөппүт оҕолоро, сиэнэ буолаллар. Кинилэр коронавирус төрөөбүт дойдуларыгар тарҕамматын туһугар киин балыыһаҕа материальнай көмөнү оҥордулар.
⠀
Үөһээ Бүлүү улууһун экономическай сайдыытыгар араас хайысханан күүскэ ылсан үлэлэһэ сылдьар предприниматель Михайловтары билбэт киһи суоҕа буолуо. Ккинилэр туруоруммут сыалларын тиһэҕэр тиэрдэр, толкуйдаабыттарын олоххо киллэрэн тэйэр биир тыллаах, чахчы да дьон туһугар үлэлиир үтүө суобастаахтар. Хаачыстыбаҕа үлэлэһэр уонна ону дьиҥ чахчы бэйэлэрин дьаныардарынан ситиһэр хоһуун дьон.
⠀
Аан дойдуну бүтүннүүтүн сатыылаабыт коронавирус диэн ааттаах ыарыы аймалҕана бүрүүкээн турдаҕына, киһи кимэ-туга биллэр. «Мила» бородуукта, канцтовар маҕаһыынын хаһаайката Елена Прокопьевна — 70 000 солкуобайы, «Оонньуур», оҕо табаарын маҕаһыынын хаһаайката Ирина Прокопьевна -10 000 солкуобайы уонна «Хлебопекарня», хаһаайына Юрий Николаевич (Татьяна Ивановна сиэнэ) — 20 000 солкуобайы киин балыыһаҕа уу харчынан аҕалан туттардылар.
⠀
Киирбит үбүнэн киин балыыһа отделениеларыгар коронавируһу бохсорго бэлэмнэнэллэригэр хаһаайыстыбаннай маллар, инфекцияттан харыстанарга тус туттуллар сириэстэбэлэр ылылыннылар.
⠀
«Убаастабыллаах Елена Прокопьевна, Ирина Прокопьевна, Юрий Николаевич! Үтүө санааҕыт бэйэҕитигэр сүүс төгүл эргийэн тиийдин, дьон махтала-таптала эһигини угуттуу турдун! Күндү бэтэрээн-кэллиэгэбитигэр Татьяна Ивановнаҕа үчүгэй үлэһит дьону иитэн-такайан таһаарбыккар барҕа махтал!», — диэн тириэрдэллэр Үөһээ Бүлүү улууһун маҥан халааттаах аанньаллар.
