М.Т.Егоров аатынан 2-с нүөмэрдээх Үөһээ Бүлүүтээҕи орто оскуола быйылгы үөрэх дьылын бэрт сэргэхтик, тэрээһиннээхтик саҕалаата. Оҕолор олорор сирдэрин бөхтөн-сыыстан ыраастаатылар.
«Мин Үөһээ Бүлүүбүн таптыыбын” аахсыйаны бу оскуола үһүс сылын ыытар. Урут үрдүкү кылаас оҕолоро эрэ үлэҕэ тахсар эбит буоллахтарына, быйыл орто сүһүөх үөрэнээччилэрэ аан бастакыларын үөрэ-көтө аахсыйаҕа кыттыстылар. Ол курдук, Ийэ уонна Дьокуускай куорат сквердэрин, өрүс үрдүн ыраастааһыҥҥа биир сомоҕо буолан үлэлээтилэр.
Маны тэҥэ үөрэнээччилэр уонна үлэһиттэр Тамалакаан нэһилиэгин бааһыналарыттан 128 куул хортуоппуйу хостоон үөрүүлэрэ үс бүк үрдээтэ. «Ааспыт сылга бу сирбититтэн баара-суоҕа 4 эрэ куулу хостоон ытыс соттон хаалбыппыт. Учууталларбытын уонна дириэктэрбитин Алексей Николаевиһы кытта бииргэ үлэлиир олус көхтөөх”, — диэн оҕолор кэпсээтилэр.
Өлгөм үүнүүнү тута оскуола кэтэх тыраахтырынан тиэйэн оннун буллардылар. Хортуоппуйдарын бу күннэргэ улууска ыытыллыахтаах «Күһүҥҥү киһи күлбүтүнэн» диэн ас-үөл дьаарбаҥкатыгар удамыр сыанаҕа атыылыахтара, онтон сороҕун оҕолор кыһынын бэйэлэрэ сиэхтэрэ.
Чаҕылхай үөрэнээччилэринэн, үрдүк билиилээх учууталларынан хайҕабылга сылдьар оскуолабыт оҕону үлэнэн иитэр бастыҥ оскуолартан биирдэстэрэ буолар.
Ааптар: Валентина ДОГОЮСОВА, «Үөһээ Бүлүү» хаһыат.
