22 От ыйа 22.07
  • 23°
  • $ 88,02
  • 96,04

Үөһээ бүлүүлэр сэлиэнньэлэрин төрөөбүт күнүн күргүөмүнэн бэлиэтээтилэр

17:43, 23 сентября 2019
Текст:
Читайте нас на
Яндекс Новости
ЯДВ

Үөһээ Бүлүү сэлиэнньэтэ төрүттэммит күнүн бэлиэтиир үрдүк тэрээһин олохтоохтору, ыалдьыттары ааспыт өрөбүллэргэ түмэ тарта. Бырааһынньык саҥа, аспаалламмыт суоллары үөрүүлээх быһыыга-майгыга арыйыыттан саҕаланна.


Бу күн сайын устата Үөһээ Бүлүү үгүс уулуссаларын аспааллаабыт үлэһит уолаттар, тиэхиньикэлэр норуот иннинэн параадтаан аастылар, дьон-сэргэ махталын, хайҕалын ыллылар.

Күннэтэ сэлиэнньэтин олоҕун-дьаһаҕын тупсарарга өйүн-санаатын, улахан сыратын уурар “Үөһээ Бүлүү бөһүөлэгэ” муниципальнай тэриллии дьаһалтатын баһылыга М.Ф. Силигиянов:

— Быйылгыттан Үөһээ Бүлүү бөһүөлэгин төрүттэммит күнүн анаан- минээн бэлиэтиир буолуохпут. Салгыы бөһүөлэкпитин сайыннарарга анаан үс федеральнай бырагыраамаҕа киирдибит. Бастакытынан, хаарбах дьиэлэри саҥардыы барыаҕа. “МСО”, “Бэрэ”, “ПМК” территориятыгар баар хаарбах дьиэлэр саҥардыллыахтара. Иккиһинэн, сайыҥҥы уу ситимэ (водопровод), үсүһүнэн, канализационнай ыраастыыр (очистительнай) станция киириилэрэ. Сэлиэнньэбит Үөдүгэй нэһилиэгэ сириттэн биэрэн, 4, 5 тыһыынча гектарынан улаатта. Кэнтик, Хоро, Нам диэки хайысхаларынан өссө кэҥиир кэскиллээх олоробут, — диэбитин олохтоохтор “ураа” хаһыынан көрүстүлэр. Маннык сайдыы, үүнүү кэлээри турарын ама, ким үөрэ-көтө ылыммат буолуой?!

Аспаалламмыт суол арыллыытын долгутуулаах түгэнигэр “Инблавер” ХЭО салайааччыта И.Е. Николаев:

— Үөһээ Бүлүү бары олохтоохторун, ыалдьыттарын Үөһээ Бүлүү бөһүөлэгэ төрүттэммит күнүнэн уонна көмүс күһүнэн эҕэрдэлиибин. Быйыл сайын 4 км. 700 м. суолга аспаалы куттубут. Уопсайынан, улуус уулуссаларын 50% аспаалланна. Инникитин чугастааҕы нэһилиэктэргэ суол оҥорор былаан баар. Биһиэхэ барыта улууспут олохтоох ыччаттара үлэлииллэр.

“Интернациональнай” уулусса махталлаах олохтоохторун аатыттан Акулина Тобукова эҕэрдэ, махтал тылларын эттэ.

Бырааһынньык үөрүүлээх түгэннэрэ салгыы Дьокуускай искибиэригэр ыытылыннылар. “Күһүҥҥү серенада” эҕэрдэ кэнсиэр, “Дьол уйата – Үөһээ Бүлүү” оҕолорго уруһуй быыстапка-күрэҕэ ыытылыннылар. Улууспут кэрэ куоластаахтара, киэн туттар ырыаһыттара бииртэн биир өрө көтөҕүллүүлээх ырыаларынан бырааһынньыктааҕы тыыны, дьон сүргэтин өссө өрө көтөхтүлэр.

“Күһүҥҥү киһи күлбүтүнэн” диэн улууска тыа хаһаайыстыбатын сылынан улуус тыа хаһаайыстыбатынан дьарыктанааччыларын, агрооскуолаларын, биирдиилээн дьон оҥорон таһаарбыт бородууксуйаларынан атыы-эргиэн дьаарбаҥката ыытылынна. Киһи сэргиирэ баар, И.Н. Барахов аатынан 1 №-дээх орто оскуола кэлэктиибэ иитэр хаастарын, кустарын, куруолуктарын, үүнээйилэрин аҕалан, сайыҥҥы үлэлэрин хаартысканан аҕалан кэпсээн дьиҥ-чахчы агрооскуола тигинэччи үлэлиирин көрдөрдө.
М.Т. Егоров аатынан 2 №-дээх орто оскуола оҕолоро атыы-эргиэн дьаарбаҥкатыгар бэйэлэринэн кэлэн атыылаан, кэпсээн, дьоҥҥо-сэргэҕэ реклама, атыы-тутуу эйгэтигэр сыстаҕастарын көрдөрдүлэр, сөхтөрдүлэр.

“Көмүс күһүн бэлэхтэрэ” диэн түөлбэлэр икки ардыларыгар ыытыллыбыт күрэххэ уруккуттан айымньылаахтык үлэлиир “Кэлтэгэй” түөлбэтэ олохтоохтук оҥостон кэлэн, көмүс күһүн бэлэхтэрин, бултарын, сир, оҕуруот астарын арааһын тэлгэтэн, күһүҥҥү уобараска киирэн таҥнан-симэнэн кэлбиттэрэ олус кэрэхсэбиллээх. Быыстапкаларыгар балык арааһа: үөлүллүбүт мундуттан саҕалаан ыһаары собо, күстэх, кыһыл харах, алыһар, сордоҥ, тэҥэли балыктар, кус , куобах тэлгэммиттэр, бэл, тииҥ чуучулата баар. Сир аһа болбуктаҕа тиийэ, бэл от арааһа: боҕуруоскай , кучу, ромашка, дьэдьэн, чыычаах отторо, о.д.а. от арааһа кыракый мөһөөччүктэргэ кутуллубут. Оҕуруот аһын арааһа: оҕурсуу, помидор, сүбүөкүлэ, моркуоп, перец, хаппыыста, о.д.а. уонна улахан үүттээх чэйдээх салабаар күһүн барахсан бэлэхтэрэ буолан байылыаттык олорор кэлтэгэйдэр олохторун кэпсииргэ дылы. Хас да сиринэн киэҥ фантазиялаан киэргэппит миэстэлэригэр ийэлэр, эбээлэр эрэ буолбакка, оҕолор, уолаттар “биһиги эмиэ кэлтэгэй түөлбэ олохтоохторобут” диэн түмсүбүттэр.

“Көмүс күһүн бэлэхтэрэ” диэн түөлбэлэр икки ардыларынааҕы күрэххэ түөлбэлэр бэйэлэрин туһунан истиэндэ көмүскээтилэр. Күһүҥҥэ аналлаах театрализованнай дьүһүйүү көрдөрдүлэр. “Күһүҥҥү киһи күлбүтүнэн” оҕуруот аһыттан быыстапка- композиция тэрийбиттэр. Хореограф үҥкүүтүн үтүктэн флэш-моб үҥкүүлээтилэр.
1-кы миэстэни Кэлтэгэй түөлбэтэ ылан оҕо былаһааккатын ылла, 1-кы Билиилээх түөлбэтэ 10000 солк. сууммалаах сэртэпикээти тутта. Маны тэҥэ түөлбэлэр икки ардыларыгар ППМИ ( программа поддержки местных инициатив) бырайыактар күрэхтэрэ ыытылынна. 1-кы миэстэни 1-кы Билиилээх түөлбэтэ ( түөлбэ сал. Н.М. Васильева) “Николай Егоров аатынан искибиэр уонна оҕолор былаһааккалара” диэн бырайыагынан ылан 1800000 суумма көрүллэн оҕо былаһаакката оҥоһуллар, 2-с миэстэни Кэлтэгэй түөлбэтэ ( түөлбэ сал. Н.Н. Морфунова) “Аныгылыы тупсаҕай көрүҥнээх нэһилиэнньэ сынньанар былаһаакката” диэн бырайыагынан ылан 500.000 солк. бүддьүөттэн көрүллэр буолла. “Үрдэл” түөлбэ ( түөлбэ сал. А.П. Григорьева) “Оҕо былаһаакката” диэн бырайыага олус кэскиллээх , инникилээх бырайыак быһыытынан сыаналанна. Бырайыактары “Үөһээ Бүлүү бөһүөлэгэ” МТ дьаһалтатын баһылыга М.Ф. Силигиянов бэрэссэдээтэллээх хамыыһыйа сыаналаата.

Киэһэ “Үс Хоһуун” стадиоҥҥа “Суорат” ырыа бөлөҕө кыттыылаах бырааһынньыктааҕы кэнсиэр буолла, барыта 700-чэ киһи түмүстэ. Киирии билиэтинэн – матасыыкыл оонньонно, баартаах Оксана Пискун матасыыкылы сүүйдэ!

Халлааны биир гына суруйа улахан салют эҕэрдэлии ыһылынна, элбэх киһи баҕа санаатын, үөрүүтүн кыырпахтара буолан куйаарга көттө. Халлаан хараҥарыыта, бөһүөлэкпит килбэйэр киинигэр, Ленин аатынан уулуссаҕа тимир остуолбалаах аныгылыы, тупсаҕай, сахалыы оһуор киэргэллээх светодиоднай лаампалар уоттара холбоннулар, инники сайдыыбытын, сомоҕолоһуубутун, кэскиллээх олоҕу кэрэһэлиирдии чаҕылыҥнаһа умайдылар, “иннибит диэки эрэллээхтик” сирдии, угуйа турдулар!

Ааптар: Валентина ФИЛИППОВА, «Үөһээ Бүлүү» хаһыат

Следите за самым важным и интересным в Telegram-канале и WhatsApp-группе ЯСИА