24 От ыйа 24.07
  • 29°
  • $ 87,3
  • 95,46

Үөһээ Бүлүү хамаандата хапсаҕайга кыайыылаах үрдүк аатын алтыс төгүлүн ылла

15:21, 13 декабря 2016
Текст:
Читайте нас на
Яндекс Новости
ЯДВ

Хапсаҕай федерациятын үбүлүөйдээх ХХ-с Кубогын иһин күрэхтэһиигэ Үөһээ Бүлүү сүүммэрдэммит хамаандата кыайыылааҕынан таҕыста. Бу да сырыыга суон сураҕырар Увар Тимофеев хамаандата алтыс төгүлүн кыайыылаах буолла.


Күрэхтэһии Нам улууһугар ахсынньы 11-12 күннэригэр буола. «А» бөлөххө Үөһээ Дьааҥы, Үөһээ Бүлүү, Сунтаар, Бүлүү уонна Дьокуускай хамаандалара киирэн күөн көрүстүлэр. «Б» бөлөххө Нам, Кэбээйи, Мэҥэ Хаҥалас, Чурапчы уонна Таатта улуустара киирдилэр. Сүүмэрдэммит хамаандаҕа 17 спортсмен: алта оҕо, биэс бэтэрээн уонна алта эр киһи киирдилэр.

Дьокуускай сүүмэрдэммит хамаандатын тренерэ Станислав Афанасьев Азия чөмпүйүөнүн Айаал Лазаревы, көҥүл тустууга аан дойдуга боруонса мэтээлин ылбыт Владислав Андреевы, Саха сирин муҥутуур кыайыылааҕын Прокопий Петрову уо.д.а чаҕылхай тустууктары хамаандатыгар ыҥырбыт.

Игорь Софронеев, Вадим Семенов, Василий Винокуров, Александр Румин курдук хапсаҕайдьыттар хамаанда састаабын өссө күүһүртүлэр.

Үөһээ Бүлүү улууһуттан кэлбит хамаандаҕа Максим Алексеев, Иван Сергеев, Ньургун Терентьев, Петр Кириллин, Влад Илларионов, Егор Руфов (оҕолор), Иван Лапатырев, Рустам Прокопьев, Станислав Степанов, Платон Саввинов, Увар Тимофеев (эр дьон), Сергей Васильев, Сергей Игнатьев, Евгений Ким, Дмитрий Петров, Валерий Иванов (бэтэрээннэр) бааллар.

Икки күн устата ыытыллыбыт эрийсиилээх киирсиилэр кэннилэриттэн бэйэлэрин бөлөхтөрүгэр намнар уонна үөһээ бүлүүлэр инники күөҥҥэ таҕыстылар. Кинилэр федерация Кубогын иһин күүрүүлээхтик күрэхтэстилэр.

Нам хамаандата бастакы хапсыһыыга инники күөҥҥэ таҕыста, ол эрээри кыайыыны былырыыҥҥы кыайыылаахтар өрө охсон ыллылар. Оҕолор уонна бэтэрээннэр ортолоругар намнар эккирэтээччи буоллулар.

Чэпчэки ыйааһыннаах Вячеслав Данилов (Нам) уонна Иван Лапатырев (Үөһээ Бүлүү) утарыта турсууларыгар Лапатырев хамаандатыгар ахсыс баллы аҕалан үөртэ.

Егор Иванов Нам хапсаҕайдьытын Александра Дуцы 9:4 ахсаанынан хотто. Ол эрээри ити кыайыылар суолталара дуона суох буолла. Өрөспүүбүлүкэ чөмпүйүөнэ Увар Тимофеев уонна Василий Винокуров хапсаҕайдарыгар Тимофеев кыайда.

Үөһээ Бүлүү хамаандата алтыс төгүлүн федерация кубогын илдьэ барда. Кинилэр намнары 10:7 ахсаанынан хоттулар. Үһүс үрдэлгэ куорат хапсаҕайдьыттара таҕыстылар.

«Биллэн турар, эрчилии кыайыы сүрүн төрдө. Биһиги бу тэрээһиҥҥэ күүскэ бэлэмнэммиппит. Эдэрдэрбит олус үчүгэйдик кииристилэр. Кыайыыттан үөрүүбүт муҥура суох улахан», — диэн СИА-ҕа Увар Тимофеев эттэ.

Следите за самым важным и интересным в Telegram-канале и WhatsApp-группе ЯСИА