Бүгүн, сэтинньи 16 күнүгэр Үөһээ Бүлүүгэ Бааһынай ырыынага арылынна диэн улуус дьаһалтатын телеграм-ханаала суруйар
Урбаанньыт Василий Прокопьев, Үөһээ Бүлүү нэһилиэгин дьаһалтата уонна Тыа хаһаайыстыбатын управлениета «Идэһэ-2023» атыы-эргиэн дьаарбаҥкатын тэрийдилэр. Ырыынак үөрүүлээх арыллыытыгар улуус баһылыгын б.к.э.т. Люция Тойтонова, сэлиэнньэ баһылыгын солбуйааччыта Егор Михайлов, Тыа хаһаайыстыбатын управлениетын салайааччыта Сергей Иванов уонна урбаанньыт, ырыынагы үлэҕэ киллэрбит Василий Прокопьев аалай кыһыл лиэнтэни быстылар.
Алгысчыт Иван Чычахов алгыс тылын эттэ, бары мустубут дьоҥҥо үтүө баҕа санааларын анаата. Эмис убаһа, сүөһү эттэрэ, үрүҥ ас арааһа, тоҥ балык о.д.а. олохтоохтор мааны остуолларыгар ас дэлэгэйин атыыластылар. Тэрийээччилэр хас биирдии ыалдьыты итии чэйинэн, алаадьынан күндүлээтилэр, шашлык амсаттылар.
