Эдьигээҥҥэ, урут технологическай кэһиилэр тахсыбыт «Кыайыы 65 сыла» хочуолунай тэриллэрин сыыйа-баайа саҥардыахтара. Биир хочуолу быйыл, өссө үс хочуолу эһиил солбуйар былааннаахтар. Бу туһунан өрөспүүбүлүкэ бырабыыталыстыбатын отчуотун кэмигэр Саха сирин бастакы вице-премьерэ Дмитрий Садовников иһитиннэрдэ.
Атын ититэр ситимнэри ылан көрдөххө, «Таежная» хочуолунайга саҥа эбийиэк тутуллуутун уонна өр умайар хочуолунайдары туруоруу варианнара ырытыллан оҥоһуллаллар. Аэропорт хочуолунайыгар быйыл хочуолу саҥардар санаалаахтар.
Маны таһынан Эдьигээн олохтоохторо социальнай эбийиэктэр тиийбэттэрин, элбэх оҕолоох ыаллары дьиэнэн хааччыйыыны, субсидиялаах авиабилиэттэри, хотугу тиэйии эрэллээх буолуутун тиэмэлэрин көтөҕөллөр. Бары ыҥырыылар тустаах министиэристибэлэргэ үлэҕэ бэриллэллэрэ бэлиэтэннэ.
Эрдэ Ил Дархан Айсен Николаев отчуоттар тус көрсөн кэпсэтии киэбинэн ыытыллан, ыраах, ыарахан нэһилиэнньэлээх пууннарга ордук наадалааҕын тоһоҕолоон бэлиэтээтэ.
«Өрөспүүбүлүкэ үгүс олохтоохторо былаас бэрэстэбиитэллэрин кытта тыыннаах кэпсэтиини ордороллор, ол чопчу нэһилиэнньэлээх пууннар сайдыыларыгар уонна олохтоох соруктары быһаарыыга сыһыаннаах боппуруостары дьүүллэһэргэ кыах биэрэр», — диэтэ кини.
Россия президенэ Владимир Путин ону тэҥэ былаас аһаҕас буолуута уонна дьону кытта тиһигин быспакка кэпсэтии дойдуну ордук көдьүүстээхтик салайарга көмөлөһөрүн бэлиэтээтэ.
