Эбээн-Бытантай улууһугар «Эдэр ыаллары дьиэнэн хааччыйыы” бырагыраама нөҥүө 9 эдэр ыалга дьиэ атыылаһалларыгар эбэтэр тутталларыгар, олорор усулуобуйаларын тупсаралларыгар сертификаттары үөрүүлээх быһыыга-майгыга туттардылар.
Эдэр ыалларга күүтүүлээх докумуоннарын туттарыы улуус дьаһалтатын дьиэтигэр ыытылынна. Ол курдук, дьиэни атыылаһарга эбэтэр туттарга социальнай төлөбүр ылар туһунан сибидиэтэлистибэни улуус баһылыга Гаврил Горохов эдэр дьиэ кэргэттэргэ Агафья Обутоваҕа, Мария, Иван Васильевка, Ньургуйаана, Афанасий Сотрудниковтарга, Карина, Андрей Семеновтарга, Светлана, Ким Ильиновтарга, Виталина, Степан Потаповтарга, Тамара, Денис Винокуровтарга, Марфа Былчаховаҕа, Аина, Альберт Голиковтарга өрө көтөҕүллэн, эҕэрдэлээн туран дохсун ытыс тыаһын доҕуһуолунан туттарда.
«Биһиги улууспут төһө эмит киин сиртэн тэйиччи турдар, суол-иис ыараханын үрдүнэн тупсаҕай тутуулаах дьиэлэрин кэлии дьон, ыалдьыттар кэлээт да тута бэлиэтии көрөллөр. Билигин олох-дьаһах өссө тупсан, эдэр дьон, эһиги дьиэ-уот туттар түгэҥҥитигэр толору хааччыллыылаах гына оҥороргутугар сүбэлиэм этэ. Уонна киһиэхэ саамай баайа-дуола – оҕото буолар. Онон, алаһа дьиэ тэринэн, оҕо-уруу төрөтөн, улуускут, төрөөбүт дойдугут туһугар үүнүҥ-сайдыҥ” — диэн Гаврил Гаврильевич баҕа санаатын тиэртэ.
“Өрөспүүбүлүкэбитигэр Ийэ, Эбээн-Бытантай улууһугар Дьиэ кэргэн сыла биллэриллэн, бүгүн дьиэ-уот туттарга, атыылаһарга сертификаттары туппут эдэр ыалларга тоҕоостоох, үөрүүлээх түгэн буолар», — диэн улуус баһылыгын солбуйааччыта Раиса Старостина бэлиэтээтэ.
Ааптар: Бытантай уоттара хаһыат, Эбээн-Бытантай улууһа
