Эбээн Бытантай улууһугар от үлэтэ күөстүү оргуйар. Атырдьах ыйа ардаҕа суох күннэрин мүлчү туппакка, отчуттар күнү-дьылы баттаһа күөх быйаҥы сомсон хаалаары күүстээхтик хамсана сылдьалларын көрөн – истэн кэллим.
“Чаалый” сирин ходуһата кураанаҕа, ото хойуута отчуттары үөрдэр. Бэйэтин чааһынайыгар оттоно сылдьар Александр Слепцов номнуо былаанын толорон, хас да оту туруоран бүтэн, аймахтарыгар көмөлөһө бараары оҥостор.
Онтон “Лабаҥха” отчуттара биир улахан оту кээһэн баран, анал оту пресстээн таһаарар тэриллэринэн боруобалыы сылдьаллар. Көрдөххө сүрдээх туһалаах, киһи оту кыайыах тэрилэ курдук, ол эрэн отчуттар этэллэринэн биһиги ходуһабытыгар улахан табыгаһа суох, уулаах, дулҕалаах сирдэргэ түһэн, бадарааны бары баһан ылар диэн санааларын үллэһиннилэр. Кинилэр ходуһалара чаалыйдардааҕар уулаах эбит, диэн бэлиэтии көрдүм.
Ол да буоллар, бары отчуттар халлааммыт туран биэрдэҕинэ былааммытын толорор кыахтаахпыт, айылҕа эрэ туран биэриэн наада, диэн күүстээх санаалаах сылдьаллар, эрэллэрин ыһыктыбаттар. Отчуттарбыт ылыммыт былааннара туоларыгар биһиги эмиэ бигэтик эрэнэбит, хороҕор муостаахпыт кыһынын төрөөбүт түөлбэтин отун сиэн ууһаатын – тэнийдин.
Марианна Слепцова, «Бытантай уоттара»
