Эбээн-Бытантай улууһугар 11 быраастан састааптаах мобильнай биригээдэ кэлэн, 10-ча күн устата үлэлээн, улуус нэһилиэнньэтин бүттүүн хаптылар. Бэл сайыҥҥы кэмҥэ суола-ииһэ суох кытыы нэһилиэктэргэ бөртөлүөт көтөр аалынан тиийэн, тус хоту улуус олохтоохторо ыраах Дьокуускай куоракка айаннаабакка, миэстэтигэр көрдөрүнэр кыахтаннылар.
Бу киэҥ далааһыннаах үлэ туһунан улууска ананан кэлбит мобильнай биригээдэ салайааччыта Надежда Попова кэпсээтэ:
2023 сылга Ил Дархаммыт Айсен Николаев ыйааҕынан Доруобуйа харысхалын киинин иһинэн ыраах сытар хоту улуустары хабар киэҥ далааһыннаах бырайыак тэриллэн үлэлии сылдьабыт. Бу кэлиибитигэр биһиги онколог, эндокринолог, кардиолог, невролог, оториноларинголог, УЗИ бырааһа, гинеколог, педиатр, терапевт буолан кэлэн нэһилиэнньэ доруобуйатын көрдүбүт, иһиттибит. Ону тэҥэ диспансеризациянан улахан дьонтон доруобуйа туругун бэрэбиэркэлиир кэккэ анаалыстары ыллыбыт.
Үлэлиир кэммит устата 2458 киһи доруобуйатын көрдүбүт. Сүрүннээн сүрэх-тымыр ыарыыта элбэх уонна да атын ыарыылар эмиэ бааллар. Көрүү түмүгүнэн хас биирдии исписэлиис тута көмөҕө наадыйар дьоҥҥо-сэргэҕэ эмтиир үлэни ыыттыбыт. Эбии көрдөрүнүүгэ, эмтэниигэ наадыйар дьону анал туһааннаах балыыһаларга киин куораппытыгар Дьокуускайга баран көрдөрөллөрүгэр сүбэ хааллардыбыт. Ону тэҥэ Дьарҕаалаах, Кустуур курдук нэһилиэктэргэ баран дьон-сэргэ доруобуйатын көрөн кэллибит.
Баҕа санаабыт диэн дьоҥҥо-сэргэҕэ олус наадалаах, табыгастаах бырайыак уһуннук, тохтообокко үлэлээтэҕинэ ыраах сытар хоту улуус дьоно киин куоракка көппөккө, исписэлиистэртэн тута олорор сирдэригэр сүбэ-ама ылан, доруобуйалара тупсан иһиэ этэ. Манна даҕатан эттэххэ, бырайыак былаанынан аны кэлэр саас эһиги улуускутугар кэлиэхтээхпит.
Улуус олохтоохторугар сүбэбит диэн бэйэҕит доруобуйаҕытын көрүнэ, хас биирдии киһи харыстана сылдьыҥ. Сылын аайы быраастарга кэлэн көрдөрөн доруобуйаҕыт туругун эмтэнэн, тупсарынан иһиҥ. Доруобай буолуҥ, ыалдьымаҥ.
Сардаана Копырина, Бытантай уоттара
