Саха сүөһүтүгэр анаммыт хотону Эбээн Бытантай улууһун Кустуур нэһилиэгэр тутарга былаанныыллар. Бу туһунан Саха сирин тыатын хаһаайыстыбатын уонна ас-үөл бэлиитикэтин миниистирэ Артем Александров бырабыыталыстыба отчуотун кэмигэр иһитиннэрдэ.
Өрөспүүбүлүкэтээҕи биэдэмистибэ баһылыга этэринэн, 80 төбөҕө аныгы эбийиэк 2027 сылга тутуллуоҕа, бырайыактыыр-сметалыыр докумуоннара бэлэм буолла. Эбээн-Бытантай оройуона төрүт саха сүөһүтүн боруодатын харыстыырынан биллэр.
Бырабыыталыстыба отчуота Эбээн-Бытантай улууһун үс нэһилиэнньэлээх пуунугар – Кустуур, Дьарҕаалаах уонна Баатаҕай-Алыытыгар буолла. Кыһыҥҥы суолунан сылдьаллар. Бөлөх салайааччытынан хайыы-үйэ иккис сылын манна бырабыыталыстыба бэрэссэдээтэлин бастакы солбуйааччы Дмитрий Садовников үлэлиир.
Толоруулаах былаас бэрэстэбиитэллэрин кытта көрсүһүүлэргэ дьон көхтөөхтүк ыйытыылары биэрдилэр. Арктика бары улуустарын курдук, үгүс дьону сибээс хаачыстыбата ордук долгутар. Түргэн интернет манна «Синергия Арктики» федеральнай бырайыак чэрчитинэн тахсыаҕа. Оттон билиҥҥитэ “Госуслуги” порталы киллэрэн туран, суһал дьыалалары быһаарарга «Арктикатааҕы Wi-Fi» туһаныахха сөп.
«Маннык көрсүһүүлэргэ саамай сыаналааҕа — аһаҕас кэпсэтии уонна улууска олоҕу тупсарарга уопсай дьулуһуу», – диэн бастакы вице-премьер Дмитрий Садовников бэлиэтээтэ.
Сыл иһигэр ситиһиллибит түмүктэр ортолоругар Кустуур нэһилиэгэр экологическай хочуолунайы киллэрии ааттанна, олохтоохтор «СӨ ОДьКХ» ГУТ ыыппыт үлэлэрин иһин махталларын биллэрдилэр. Оройуон киинигэр Баатаҕай-Алыытыгар эргиэн-логистика киинин киллэрии күүтүллэр.
Бары сэлиэнньэлэргэ олохтоохтор тус кэпсэтиилэрэ буолла, ону тэҥэ отчуот кэмигэр наҕараадалар бэрилиннилэр. Чуолаан, Кустуур сэлиэнньэтигэр «Гражданскай килбиэн» диэн бэлиэни Наталья Горохова, 40 сыллаах үлэ ыстаастаах фельдшер ылла.
