Сэтинньи 19 күнүгэр 11-с кылаас выпускниктара бастакытын компьютернай БКЭҕэ холонон көрдүлэр. Үөрэх хаачыстыбатын кэтиир киин салайааччыта Надежда Попова эппитинэн, эксээмэн 66 сиринэн ыытыллыбыт. Түмүк сэтинньи 30 күнүгэр диэри биллиэ.
Горнай улууһун Бэрдьигэстээх оскуолатын үөрэнээччитэ Леонид Хурда эксээмэн эпидемиологическай ирдэбиллэри толору тутуһан ыытыллыбытын эттэ. «Информатика эксээмэнигэр учууталбын кытары 9 –с кылаастан бэлэмнэнэбит. Холонуу эксээмэн буоларын иһин улаханнык долгуйбатым. Маннык эксээмэн мөлтөх өрүттэргин билэргэ, эксээмэн хайдах барарын билсэргэ аналлаах. Эксээмэни компьютерга толорор быдан табыгастаах, лиискэ сыыһа түһэрдэххинэ аналлаах бланканы барытын уларытыаххын наада, компьютерга сыыһаны көннөрөр судургу», — диир Леонид.
2021 сылга информатикаҕа БКЭ выпускниктар бастакытын компьютерга толоруохтара. Холонуу эксээмэн онуоха тургутуу, бэлэмнэнии быһыытынан ыытылынна.
This post was published on 20.11.2020 13:04 13:04