13 Атырдьах ыйа 13.08
  • 16°
  • $ 60,9
  • 62,54

«Дьулуур - мас рестлинг” спортивнай дырааманы 2022 сыл бэс ыйын 2 күнүттэн көрүҥ

«Дьулуур»: мас-рестлинг» киэҥ быракаакка 2022 сыл бэс ыйын 2 күнүгэр тахсыаҕа. Саха киинэлэриттэн биир саамай күүтүүлээх спортивнай дыраама тута сахалыы уонна нууччалыы саҥарыаҕа. РФ Култуураҕа министиэристибэтин өйөбүлүнэн уһуллубут саха бастакы киинэтэ.

Сүрүн оруолларга: Гаврил Менкяров («Посланник с небес») уонна  Иннокентий Луковцев («Нуучча», «Надо мною солнце не садится»). Ону сэргэ, бырайыакка артыыстар Владимир Епифанцев, Айталина Лавернова, Владимир Михалев, Роман Дорофеев уо.д.а. кытыннылар.

Киинэ режиссера: Валентин Макаров.

Сценарий: Мария Находкина, Валентин Макаров,  Любовь Борисова кыттыылаах Дарья Серенко.

Оператор: Семен Аманатов.

Композитор: Моисей Кобяков.

Продюсердар:  Филипп Абрютин, Оксана Лахно уонна  Иннокентий Луковцев.

Саха сиринээҕи пиар продюсер: Яна Байгожаева.

Киинэҕэ сүрүн саундтрегы саха омугун биир талааннаах ырыа айааччыта, ырыаһыт Jeedda толордо. «Дьулуур» трегэ хайы-үйэ Яндекска таҕыста. Муусуканы Яндекска, ВКонтакте уонна «Саха» араадьыйатыгар, «Виктория Саха» ыстаансыйаларга истиэххэ сөп. Киинэ туһунан буруолуу сылдьар сонуннары телеграмҥа «Аныгы саха киинэтэ” каналга t.me/sakhakiinete суруйтаран, билэ-көрө, ааҕа олоруоххутун сөп.

Киинэ кылгас ис хоһоонун кэпсээтэххэ, Дьулуур (нуучча тылынан «Джулур» дэнэр) аармыйаҕа сулууспалаан баран, Саха сиригэр төрөөбүт дэриэбинэтигэр төннүбүт эдэр уол.  Кини манна кырдьаҕас эбэтин уонна кыра балта Күннэйи кытары олорор. Түгэн тосхойон Дьулуур күрэхтэһиилэргэ кыттар уонна мас тардыһыытыгар дьоҕурдааҕын билэр. Ол гынан баран, чугас киһитин өлүүтэ инники былаанын барытын туора сотон кэбиһэр. Дьулуур кырачаан балтын Күннэйи быыһыыр биир эрэ суоллаах — мас тардыһыы  чемпионатыгар кыайдаҕына. Эрчиллиилэр, күөн көрсүһүүлэр, ыарыы, эчэйии уонна кутталы туорааһын  — Дьулуур барытыгар бэлэм.

Кини  бэйэтигэр халбаҥнаабат сыал-сорук туруорунар – кырачаан балтын бэйэтэ иитэр кыахтанар,  кини аттыгар бииргэ буолар туһуттан, кыайыы өрөгөйүн ситиһиэхтээх. Ол уустук суолугар уол үгүс тургутууну, эрэйи-муҥу туоруурга күһэллэр.

Киинэни продюсер быһыытынан «Эдэр ыччат көҕүлээһиннэрэ» («Молодежные инициативы») «Скаzка» киинэ хампаанньатын,  «Ayar aat» айар холбоһугу, РФ Култуураҕа министиэристибэтин өйөбүлүнэн «Сахафильм» киинэ устуудьуйатын кытары бииргэ уһулла.  «Дьулуур: мас-рестлинг» — РФ Култуураҕа министиэристибэтин өйөбүлүнэн уһуллубут саха бастакы киинэтэ. Ону таһынан, хартыына уһулларыгар  Мас тардыһыы  федерацията уонна Саха сирин бырабыыталыстыбата  көмөлөстүлэр. Киинэ «Пушкин картата» бырагыраама кыттыылааҕа буолар.

Көрөөччү сааһа: 12+

Следите за самым важным и интересным в Telegram-канале и WhatsApp-группе ЯСИА
0
0