Дьокуускай оскуолатын үөрэнээччитэ үөрэнэр сирин таһыгар оонньуу сылдьан хараҕын ыараханнык эчэппитин туһунан биһиги хайыы-үйэ иһитиннэрэн турабыт. Түөрт чаас устата офтальмохирурдар хараҕын уонна халтаһатын дириҥ бааһын тикпиттэрэ. Эпэрээссийэ кэнниттэн махтаналларын оннугар аймахтарын уонна педагогтар өттүлэриттэн эмчиттэри буруйдаан барбыттара.
Саха сирин Доруобуйа харыстабылын министиэристибэтигэр үөскээбит балаһыанньаны маннык быһаардылар: “Педиатрическай кииҥҥэ кэлээтин кытта тута идэтийбит медицинскэй көмөнү суһаллык оҥорбуттара. Уустук уһун эпэрээссийэ кэмигэр анал хирурдар оҕо хараҕын уонна халтаһатын үгүс дириҥ баастарын тикпиттэрэ. Хараҕын быыһаатылар, ол эрээри эчэйиитэ ыараханынан сибээстээн, түмүгэ хайдах буолара биллибэт”, — диэн биэдэмистибэҕэ иһитиннэрдилэр.
Доруобуйа харыстабылын министиэристибэтэ педагогтар медицинскэй үлэһиттэр дьайыыларыгар сыана быһар уонна буруйдуур бырааптара суоҕун бэлиэтээтилэр.
Санатан эттэххэ, травмпунктан эмсэҕэлээбит оҕо тутатына суһал көмө массыынатынан оҕо идэтийбит тэрилтэтигэр тиэрдиллибитэ.
Министиэристибэҕэ бу түгэнинэн бэрэбиэркэ саҕаланна. Оҕону эмтииргэ бары наадалаах эмтэр уонна тэриллэр бааллар. Оҕону киин килииникилэргэ ыытарга төрүөт суох.
