Дьокуускай куорат салгынын буортулуур кэҥсик сытын төрдүн-төбөтүн буларга баһылык Евгений Григорьев сорук туруорда. Ол туһунан олунньу 17 күнүнээҕи планеркаҕа дьон ыйытыытынан боппуруоһу көрүү кэнниттэн этилиннэ.
«Бүлүүлүүр суолга полигоҥҥа умайыы тахсыбатаҕа балтараа сыл буолла. Ити эрээри салгыҥҥа куһаҕан сыт баарын олохтоохтор этэллэр. Бу боппуруоһу быһаарыахха наада. СМИ-ны полигоҥҥа ыҥырыҥ, экология министиэристибэтин эмиэ, наада буоллаҕына, онно туох да умайбатын көрүҥ-истиҥ», — диэтэ Григорьев.
«Роспотребнадзор» регионнааҕы бэрэстэбиитэлэ эппитинэн, ааспыт нэдиэлэҕэ салгыны кээмэй кэмигэр нуорманы куоһарыы бэлиэтэммэтэ.
Эрдэ экология миниистирэ Евгений Перфильев телеграм-ханаалыгар суруйбутунан, барыллаан информациянан Дьокуускай салгынын киртийиитэ Бүлүүлүүр суолга баар хомунаалынай бөх-сах полигонугар умайыы баарыттан тахсыбыт буолуон сөп.
This post was published on 17.02.2025 11:00 11:00