Дьокуускайтан оройуоннарга оптуобус сырыытын 2026 сыл саҕаланыаҕыттан сөргүтүөхтэрэ. Муниципальнай кэккэ маршруттар үлэлэрин тохтотуу быстах дьаһал буолар. Бу туһунан Саха сирин тырааныспарын уонна суол хаһаайыстыбатын миниистирэ Владимир Сивцев «Саха сирэ 24» телеханаалга «Актуальнай интервью» биэрии эфиригэр иһитиннэрдэ .
Алтынньы 21 күнүттэн 201 № -дээх «Дьокуускай – Покровскай – Мохсоҕоллоох», 202 № -дээх «Дьокуускай – Бэрдьигэстээх», 203 №- дээх «Дьокуускай – Нам — Хатырык» уонна 206 №- дээх «Аллараа Бэстээх — Чурапчы» маршруттарынан пассажирскай оптуобустар сырыылара быстах кэмҥэ тохтуоҕа. Быһаарыы судаарыстыбаннай дуогабардар болдьохторо бүппүтүнэн уонна болдьоҕу уһатарга үп-харчы суоҕунан сибээстээх.
«Бу маршруттар үлэлэрэ эһиилги сыл саҕаланыаҕыттан сөргүтүллүөҕэ. 2026 сыллааҕы бюджет бырайыагар ону салҕыырга наадалаах үп көрүлүннэ, онон бу хааччахтааһын быстах дьаһал буолар», — диэтэ Владимир Сивцев.
Онуоха Дьокуускай куораты уонна Жатай бөһүөлэгин ситимниир 209 №-дээх уонна 211 №- дээх маршруттар штатнай эрэһииминэн үлэни салҕыыллар. Миниистир бэлиэтээбитинэн, бу хайысхалар өрөспүүбүлүкэтээҕи муниципальнай маршруттар статустарын ылан, олохтоохторго саамай наадалаахтарынан билиниллэр.
This post was published on 17.10.2025 16:15 16:15