Оптуорунньукка, балаҕан ыйын 2 күнүгэр, Дьокуускайга «Вахта Памяти – Якутия» көһө сылдьар экспедиция үлэтин түмүгүн таһаардылар. Тэрээһин көлүөнэлэр утумнаах буолууларын бэлиэтэ уонна Аҕа Дойду Улуу сэриитин геройдарын хорсун быһыыларыгар сүгүрүйүү буолла, диэн ЯСИА иһитиннэрэр.
«Атырдьах ыйын 18 күнүттэн балаҕан ыйын 2 күнүгэр диэри “Патриот» ыччат киинэ бойобуой дьайыылар бэтэрээннэрин Ассоциациятын уонна Россия ДОСААФ-н кытары өрөспүүбүлүкэ киэҥ далааһыннаах экспедициятын ыыттылар. Маршрут Томпо уонна Хаҥалас оройуоннарын хабан, Дьокуускайга түмүктэннэ. Кыттааччылар сөмөлүөттэр саахалламмыт сирдэригэр, ГУЛАГ урукку лааҕырдарыгар сырыттылар, АлСиб мемориалларыгар сибэкки дьөрбөтүн уурдулар, көрдүүр үлэлэри ыыттылар уонна олохтоох дьону кытта көрүстүлэр», — диэн кэпсээтэ «Патриот» ыччат киинин дириэктэрин солбуйааччы Екатерина Кизь. Кини «Вахта Памяти – Якутия» — ытыктабыл, махтал суола буоларын бэлиэтээтэ.
«Улахан суолталаах үлэни өйдүүбүт, ытыктыыбыт, салҕыыбыт. Киин тэриллиэҕиттэн ыла бу бииргэ үлэлээбит бастакы тэрээһиммит, онон историческай өйдөбүлү харыстааһын уопсай дьыалатыгар ыччаты, бэтэрээннэри түмэн маннык ситиһиилээхтик ааспытыттан үөрэбит», — диэтэ Кизь. Бу күн экспедиция тэрийээччилэрэ оҥорбут үлэлэрин түмүктэрин үллэстэн, бырайыагы өйөөбүт дьоҥҥо махтал суруктары туттардылар.
Экспедиция салайааччыта, Саха сирин ис дьыалатын органнарын бойобуой дьайыыларын уонна ис войскаларын бэтэрээннэрин Ассоциациятын бэрэссэдээтэлэ Николай Гребенников экспедицияҕа оҕолор кыттыыларыгар ураты болҕомтотун уурда.
«Үгүстэр 17-18 саастаах оҕолору походка ылыахтарыттан куттаналлар. Ол гынан баран биһиги 10-тан 14-гэр диэри саастаах оҕолору илдьэ барбыппыт. Патриотизмы кыра эрдэҕиттэн иҥэриэххэ наада буоллаҕа. Биһиги эдэр кыттааччыларбыт улахан дьону кытта тэҥҥэ айаннаабыттара, ким да ыалдьыбатаҕа, бары бэйэлэрин сөптөөхтүк көрдөрбүттэрэ», — диэн Гребенников тоһоҕолоон бэлиэтээтэ. Кини этэринэн, экспедиция историческай көрдүүр элеменнэри киллэрбит.
«Хайа бараанын, дьиикэй айылҕаны кэтээн көрбүппүт. Бу сири-дойдуну чинчийии эрэ буолбакка, албан ааттаах сирдэринэн сырыы буолар. Оҕолор историяны илэ харахтарынан көрөллөрүгэр, холобур, манна саахалламмыт сөмөлүөтү көрөллөрүгэр баҕарабыт. Суол судургута суох, хайаларынан уонна суола-ииһэ суох сиринэн 25 килэмиэтир кэриҥэ сырыттыбыт. Биһиги түүн хойукка диэри фонариктарынан сирдэтэн бардыбыт», — диэн Николай кэпсээтэ.
Санатан эттэххэ, экспедицияҕа уонча эдэр дьон кыттыыны ылла. Кинилэр историяны көрдүлэр, хамаанданан үлэлээтилэр, хонуу усулуобуйатыгар бэйэлэрин кыахтарын холоннулар. Тэрээһин үүнэр көлүөнэни патриотическай иитии дьыалатыгар улахан суолталаах хардыы буолла.
This post was published on 03.09.2025 14:12 14:12