Дьокуускайга куорат киинигэр турар автовокзал оннугар Үрүҥ күөл уонна Медицина киинин оройуонугар транспорынан дьон айанныыр сирдэрэ тэриллэрэ былааннанар. Өрөспүүбүлүкэ киин куоратын баһылыга Евгений Григорьев «Россия 24» телеханаалга «Куораты кытта быһа эфир» бырагыраамаҕа эппитинэн, саҥа дьаһал айан сыанатын уонна сырыытын чэпчэтиэҕэ.
«Дьокуускай уопсастыбаннай транспорын тиһигэ икки сир баар буоларын ирдиир. Улахан научнай үлэ ыытылынна, ол быһыытынан үлэни тэрийэбит», — диэтэ Евгений Григорьев.
«Практика көрдөрөрүнэн, суол-тырааныспар сулууспатын үлэһиттэрин бигэргэтиилэринэн, пассажирдар сүрүн маассалара куорат хотугу өттүгэр (аэропорт оройуонугар) уонна соҕуруу өттүгэр (Медкиин оройуонугар) тахсаллар. Билигин оптуобустар киин сиргэ хаайтаран тураллар. Холобур, Маҕан эбэтэр Хатас сэлиэнньэлэригэр тиийэр айаннааччылар суолларын үксүн куоракка ыыталлар», — диэн Григорьев бэлиэтээтэ.
Икки киин тэриллиитэ куорат таһынааҕы оптуобустарга сырыыны чэпчэтиэҕэ.
«Биһиэхэ 35 маршрут баар буолуоҕа: 5 магистральнай, 15 куорат уонна 10 куорат таһынааҕы. Ону тэҥэ таска 5 тиэйэр маршрут үлэлиэҕэ. Биһиги бу сыалга былааннаахтык баран иһэбит, систиэмэ үлэлиэҕэ», — диэн Дьокуускай баһылыга эрэллээҕин биллэрдэ.
This post was published on 19.08.2025 10:22 10:22