Чэппиэргэ, сэтинньи 27 күнүгэр, Дьокуускайга Спортивнай микрооройуоҥҥа «Мичээр» саҥа оҕо саада аһылынна. Саха сирин баһылыга Айсен Николаев телеграм-ханаалыгар суруйбутунан, 3759 кв. м иэннээх оскуола иннинээҕи тэрилтэни куоракка биир бастыҥынан ааттыахха сөп.
Оскуола иннинээҕи тэрилтэ Кулаковскай уулуссатыгар баар «Улыбка» оҕо саадын филиала буолуоҕа. 240 миэстэлээх саҥа оҕо саадыгар физкультурнай уонна музыкальнай саалалар, медицинскэй блок, галокамера, аһыыр блок, ону тэҥэ территориятыгар спортивнай былаһаакка баар. 12 бөлөх үлэлиэҕэ.
«Киэҥ бөлөхтөр, хаачыстыбалаах тэрил, толкуйдаах сайдыылаах эйгэ уонна икки тылынан үөрэтии — барыта оҕо бэйэтин эрэллээх, интэриэһинэйдик аан дойдуну арыйарыгар анаан тэриллибит. Бөлөхтөргө оҕолор киирбиттэригэр, дьиэ сылаас тыыннаммыта билиннэ. Оҕолор түргэнник үөрэнэн, оонньоон, билсэн бардылар. Иитээччилэр маннык усулуобуйаҕа үлэлииллэриттэн үөрэллэрин, атмосфера оҕолору кытта болҕомтолоох, толкуйдаах үлэҕэ көҕүлүүрүн бэлиэтээтилэр. Бу дьиэҕэ кэлэктиипкэ уонна кырачааннарга табыгастаах, куттала суох буолуоҕун мэктиэтэ», — диэн бэлиэтээтэ Айсен Николаев.
Спортивнай кыбаартал сайдыыта, 17-с кыбаарталы көһөрүү процеһын киллэрэн туран, территорияны биир кэлимник сайыннарыы бырайыагын чэрчитинэн барар. 2017 сыл кэнниттэн саахалланар туруктаах дьиэлэр быһыытынан билиниллибит саамай элбэх дьиэ манна баар. Көһөрүү уопсай иэнэ 90 тыһ. кв. м. тахса. бүгүҥҥү күҥҥэ территориялары кэлимник сайыннарыы чэрчитинэн 11 дьиэ көһөрүллүбүт, өссө 17 дьиэттэн дьону көһөрөр үлэ барар.
«Бу Россия президенэ Владимир Владимирович Путин сорудаҕынан олоххо киирэр Дьокуускай маастар-былаанын сорҕото. Маннык сыһыан саҥа оройуоннары бытархайдык буолбакка, бастакы күнтэн олоххо табыгастаах биир кэлим, толору хааччыллыылаах куорат эйгэтин быһыытынан тэрийэргэ кыаҕы биэрэр. «Мичээр» оҕолор үөрэ- көтө, төрөппүттэр итэҕэйэн барар сирдэрэ буолуо диэн эрэнэбин», — диэн өрөспүүбүлүкэ баһылыга эттэ.
This post was published on 28.11.2025 16:09 16:09