Туруктаах сайдыыга VI Хотугу форум (СФУР) сэтинньи 26-28 күннэригэр Дьокуускайга буолуоҕа. Бу туһунан ТАСС-ка ВЭФ кэмигэр Хотугу форум секретариатын толорооччу дириэктэрэ Владимир Васильев иһитиннэрдэ.
«Хотугу туруктаах сайдыыга форум ыытыллар күннэрэ быһаарылынна — сэтинньи 26-28 күннэрэ. 2025 сыллааҕы форум сүрүн темата биллэр, “Хоту уонна Арктика — уларыйар эйгэҕэ партнерство». Килиимэт түргэнник уларыйыыта, муус ириитэ, муора саҥа суолларын арыйыы уонна айылҕа баай ресурсаларыгар тиийии кыахтары да, улахан кыһалҕалары да үөскэтэр. Бу уларыйар эйгэҕэ Хотугу Сир уонна Арктика туруктаах сайдыыларын боппуруостарыгар бииргэ үлэлээһин ураты экосистеманы туруктаахтык хааччыйыыга уонна харыстааһыҥҥа тутаах фактор буолар», — диэтэ Васильев.
Форум архитектурата экологияҕа, Арктика инфраструктуратыгар, төрүт омуктар түмсүүлэрин бигэ сайдыытыгар, креативнай индустрияларга уонна Арктика культуратыгар глобальнай контекска, үөрэхтээһиҥҥэ уонна наукаҕа бииргэ үлэлээһиҥҥэ темалаах блоктартан турар буолуоҕа диэн эбэн эттэ.
Хотугу туруктаах сайдыыга форум — Хотугу сир уонна Арктика туруктаах сайдыытын кыһалҕаларын уонна кэскиллэрин дьүүллэһэр сыллата үлэлиир норуоттар икки ардыларынааҕы экспертнэй былаһаакка. Форум сүрүн идеята — Хотугу сир уонна Арктика регионнарын бигэ сайдыыларын кыһалҕаларын быһаарыыга аан дойду түмсүүтүн түмүү, ООН бигэ сайдыытын 17 сыалын ситиһии.
Форум тэрийээччилэринэн Хотугу форум, Саха Өрөспүүбүлүкэтин бырабыыталыстыбата, Хотугулуу-Илиҥҥи федеральнай университет, Арктика судаарыстыбаннай култуура уонна искусство института буолаллар. Форум партнера — Андрей Мельниченко Үтүө фондата.
This post was published on 08.09.2025 12:28 12:28