Дьокуускайга бастакы айанньыт Семен Дежневка анаммыт пааматынньыгы чөлүгэр түһэриэхтэрэ. Санатар эбит буоллахха, история эбийиэгин вандаллар алдьаппыттара.
Пааматынньыгы скульптор кыттыылаах култуура нэһилиэстибэтин эбийиэктэрин чөлүгэр түһэриинэн дьарыктанар тэрилтэ оҥоруоҕа. Ол туһунан куорат мэра Евгений Григорьев эттэ.
«Бу култуура нэһилиэстибэтин эбийиэгэ буоларынан, хайаан да анал көҥүллээх тэрилтэ чөлүгэр түһэриигэ ылсыахтаах, скульптордаах буолара ирдэнэр. Куорат кылаабынай архитектора Семен Сергеев тус хонтуруолугар тутарыгар сорудахтанна. Пааматынньык суһаллык чөлүгэр түһэриллиэхтээх», — диэн суруйда кини социальнай ситимнэргэ.
Григорьев вандаллар быһыыларын «циничнайынан уонна ааспыт олох истоииятыгар силлээһин» быһыытынан сыаналаата уонна пааматынньыкка инникитин видеокамера баар буоларын эттэ.
Санаттахха, тохсунньу 10 күнүгэр биллибитинэн, биллибэт дьон Киров уулуссатыгар баар Семен Дежнев скульптуратыттан муннун быһан ылбыттар. Холуобунай дьыала тэрилиннэ. Көрдөөһүн үлэтэ барар.
Хаартыска: Мария Архипова, СИА
This post was published on 12.01.2023 15:01 15:01