Арыгылаах утахтан туттунуу нэдиэлэтэ уонна «Арыгыта суох Арктика» конгресс түмүктэннилэр. Түмүк таһаарыы чэрчитинэн уопсастыбанньыктар, спорсменнар уонна чөл олох актыбыыстара (барыта 60-ча киһи) култуура уонна сынньалаҥ куораттааҕы пааркатын умайбыт учаастагын таһыгар 50-тан тахса маһы олортулар.
Мастаах аллеяларын чөл олоххо аныырга быһаарыннылар.
– Паарка бу учаастагар саҥа тыыны биэрэргэ элбэх былааннаахпыт. Бу учаастакка спортивнай тренажердары ууруохпутун баҕарабыт. Оччоҕо куорат олохтоохторо манна кэлэн босхо дьарыктаныахтара. Кинилэр хайаан да «Чөл олох» аллеятынан кэлиэхтэрэ, – диэн куорат пааркатын дириэктэрэ Айаал Бурцев былаанын үллэһиннэ.
Матвей Лыткин салайааччылаах тэрээһин кыттыылаахтара аллея тула туран, чөл олох гимнин ыллаатылар уонна оһуохайдаатылар.
This post was published on 15.09.2016 10:03 10:03