Кыбаартал диэки уонна Сайсаарга икки спортивнай комплекс тутулла турар, ону таһынан, катоктаах уонна бассейнаах уонна физкультурнай-чэбдигирдэр комплекс Дьокуускайга үлэҕэ киириэҕэ. Саҥа эбийиэктэри 2024 сыллаахха буолар «Азия оҕолоро» спортивнай оонньууларга үлэлэтэр былааннаахтар, диэн СИА кэпсиир.
«Оонньууларга элбэх функциялаах спортивнай комплекстар Строительнай уонна Сайсаар уокуруктарыгар тутуллуохтара. Оттон «Газпром- оҕолорго» быраргыраама үбүлээһининэн, Мархаҕа катоктаах уонна бассейннаах физкультурнай чэбдигирдэр комплекс үлэҕэ киириэҕэ», — диэн СӨ физическэй култуураҕа уонна спорка миниистирин бастакы солбуйааччы Александр Бугаев иһитиннэрдэ.
Кини оонньуулары бэлэмнээһиҥҥэ уонна ыытыыга өрөспүүбүлүкэтээҕи тэрийэр кэмитиэт тэриллибитин, дьаһаллар былааннара бигэргэммитин туһунан кэпсээтэ. Дьокуускайга «Азия оҕолоро» оонньууларга уон икки спортивнай эбийиэк үлэҕэ киириэҕэ, үгүстэригэр өрөмүөн үлэлэрэ былааннанар.
Сүүмэрдэммит хамаандаҕа хандьыдааттар бэлэмнэнэ сылдьаллар, күрэхтэһиилэргэ кытталлар, уопуттарын мунньаллар.
This post was published on 11.11.2022 15:05 15:05