Дьокуускай прокуратурата чааһынай оҕо саадыттан үс саастаах оҕо тахсан барбыт чахчытынан бэрэбиэркэ ыытта. От ыйын 18 күнүгэр 3 саастаах кыыс иитээччи болҕомтото суох көрөр буолан, уһуйаантан тахсан барбыт.
Кыра кыыһы тэрилтэ таһынааҕы дьиэ инниттэн ааһан иһэр киһи булан ылбыт. Кини оҕону чугастааҕы полиция отделыгар илдьибит. Кыыс төрөппүттэрин тута быһаарбыттар.
Бу түбэлтэнэн прокуратура бэрэбиэркэ тэрийдэ. Чааһынай оҕо саадын салайааччытын олоҕу уонна доруобуйаны харыстааһыҥҥа үөрэнэр быраабы кэһии иһин 10 тыһыынча солкуобайга ыстарааптаатылар. Иитээччигэ быыгабар биллэрдилэр.
Бу түбэлтэ кэнниттэн уһуйааҥҥа оҕо куттала суох буолуутун хааччыйар эбии дьаһаллары ылыммыттара бэлиэтэннэ.
This post was published on 29.08.2022 12:03 12:03