«Якутия» ТОР резиденэ, «Туризм Якутия» хампаанньа Намныыр тракт 20 км аныгылыы туристическай комплекс тутуутун былаанныыр. Саха сирин киин куоратыгар ыһыах ыһар «Үс Хатыҥтан» чугас, диэн иһитиннэрдилэр. Манна ыалдьыт дьиэлэрэ, спа-киин, ресторан баар буолуохтаах, суруйда СИА.
«Туризм Якутия» хампаанньа Ростуризмҥа регистрациялаах официальнай туроператорынан буолар, ис туризмынан дьарыктанар.
«Билигин баар баазабыт олус ыраах, Өлүөнэ Очуостарыгар, куораттан 205 километрдаах сиргэ. Өссө биир баазабыт Сиинэҕэ Хаҥалас улууһугар баар, эбии Булгунньахтаахха тутуохпут, манна мас дьиэлэр баар буолуохтара, үс дьиэ бэлэм. Баазалар ыраах буоланнар дьон өрөбүллэригэр эрэ сынньана барар кыахтаахтар. Билигин саҥа талбыт сирбитигэр сайаапка ТОР-га биэрдибит. Биһиги талбыт сирбит индустриальнай паарка территориятыгар баар. Билигин сөбүлэсиһии түһүмэҕэ ыытыллар. Дьокуускайтан чугас сир оннооҕор атыыга суох», — диэтэ турхампаанньа салайааччыта Анатолий Габышев.
Туристическай комплекска кыра бөлөхтөргө, дьиэ кэргэнинэн сынньанарга анаммыт мас дьиэлэр тутуллуохтара. Сааскы-сайыҥҥы уонна күһүҥҥү сезоннарга глэмпинг баар буолуоҕа. Инникитин спа-киин уонна ресторан тутуллуоҕа.
This post was published on 11.04.2022 15:01 15:01