Бүгүн Дьокуускай куорат Доҕордоһуу болуоссатыгар Российскай Федерация судаарыстыбаннай былааҕын Күнүгэр аналлаах бырааһынньыктааҕы тэрээһин буолла. Үөрүүлээх церемонияҕа салалта, уопсастыбанньыктар, бэтэрээннэр, киин куорат эдэр олохтоохторо уонна элбэх ыалдьыттар кытыннылар. Бу туһунан Дьокуускай куорат думатын пресс-сулууспата иһитиннэрэр.
Бырааһынньык сүрүн түгэнинэн судаарыстыбаннай наҕараадалары туттарыы сиэрэ-туома буолла. Саха сирин бырабыыталыстыбатын бэрэссэдээтэлин солбуйааччы Анатолий Семенов анал байыаннай дьайыы кэмигэр байыаннай иэһин толорууга хорсун быһыыны-майгыны көрдөрбүт байыаннайдарга уордьан, мэтээллэри туттарда.
Бырааһынньыгынан Российскай Федерация Геройа, РФ үөрэҕириитин министиэристибэтин департаменын дириэктэрэ Игорь Юргин уонна Дьокуускай баһылыга Евгений Григорьев, Дьокуускай куорат думатын бэрэссэдээтэлэ Альберт Семенов эҕэрдэлээтилэр.
Дьокуускай куорат бастыҥ үөрэнээччилэригэр Российскай Федерация гражданин пааспардарын туттарыы сиэрэ-туома тэрээһиҥҥэ ураты үөрүүлээх буолла. Ситии-хотуу быраабын кэрэһилиир сүрүн докумуону оҕолор куорат баһылыга Евгений Григорьев уонна Дьокуускай куорат думатын бэрэссэдээтэлэ Альберт Семенов илиилэриттэн ыллылар.
Россия саҥа гражданнарыгар туһаайан Альберт Семенов: «Биһиги триколорбут – улуу Россия биир сомоҕо буолуутун, кини историческай утумнааһын бэлиэтиир. Бу былаах биһигини үтүө дьыалаларга, ситиһиилэргэ көҕүлүүр. Эһиги пааспаргыт — күүстээх норуот туоһута. Эһиги – албан аатырбыт үгэстэр нэһилиэнньиктэрэ уонна Россия историятын инники айааччылара буолаҕыт. Дойдубут былааҕа эһиэхэ мэлдьи билии-көрүү, ыра санаа, чаҕылхай ситиһиилэргэ сирдиир сулус буоллун!»
Маны сэргэ тэрээһиҥҥэ Дьокуускай куорат бэтэрээннэрин Сэбиэтин бэрэссэдээтэлэ Николай Тряпша эҕэрдэ тыл эттэ.
Тэрээһин куорат айар кэлэктииптэрэ кыттыылаах бырааһынньыктааҕы кэнсиэринэн салҕанна.
This post was published on 22.08.2025 16:36 16:36