Дьокуускай куорат 202-с микрооройуонугар «Бригантина» дьиэтигэр «Патриот» элбэх хайысхалаах ыччат киинин өрөмүөнэ өрөбүлэ суох ыытыллар. Үлэни бүтэрии ахсынньы 1 күнүгэр болдьохтоох, онно арыйыы сиэрэ-туома ыытыллыаҕа, диэн иһитиннэрдэ киин салайааччыта, анал байыаннай дьайыы кыттыылааҕа Сулустан Заболоцкай.
«Билигин тутааччылар истиэнэлэри штукатуркалаан, өһүөлэри оҥорон бүтэрэн эрэллэр. Ити кэнниттэн муоста оҥорууга, цемент суурадаһынынан тэҥнээһинэ, салгыы – өһүө, истиэнэлэри, муосталары тыаһы киллэрбэт-таһаарбат гына таҥыахтара. Эбийиэккэ отучча киһи, уон үлэһиттээх үс биригээдэ үлэлиир», – диэтэ Сулустан Заболоцкай.
«Патриот» киин «Бригантина» дьиэ иккис уонна үһүс этээстэригэр баар буолуоҕа. Ыччат киинин таһынан манна атын тэрилтэлэр эмиэ киириэхтэрэ.
Ыччакка аныгылыы оҥоһуулаах усулуобуйаны тэрийиэхтэрэ – коворкинг, спордунан уонна айар үлэнэн дьарыктанар саалалары, графическай художниктарга аналлаах устуудьуйаны, маастар-кылаастары, семинардары ыытар, видеоролигы, подкасты уонна биэриилэри суруйар былаһааккалары тэрийии былааннанар.
Санатан эттэххэ, муус устар 25 күнүгэр Саха сиригэр «Патриот» диэн саҥа элбэх хайысхалаах ыччат киинэ официальнайдык үлэтин саҕалаабыта. Саҥа ыччат киинэ Саха сирин баһылыга Айсен Николаев сорудаҕынан тэриллибитэ. Киин миссията — патриотическай иитии бары киэптэрин сүрүннээһин, добровольчествоны уонна волонтерствоны сайыннарыы, ыччат көҕүлээһиннэрин өйөөһүн, бары кыттааччылары биир саҕалааһыҥҥа түмүү, ыччат уопсастыба олоҕор көхтөөхтүк кыттарыгар миэстэни тэрийии.
