Аҕа дойдуну көмүскээччилэр күннэрин уонна патриотическай иитии олунньутааҕы үгэс буолбут тэрээһин иннинэ С.Н.Донской-II аатынан үөрэҕи сайыннарыы уонна квалификацияны үрдэтии института патриотическай иитии эйгэтигэр күүһү сомоҕолуурга аналлаах экспертнэй сессияны тэрийдэ. Тэрээһин үүнэр көлүөнэҕэ гражданскай позицияны уонна төрөөбүт дойдуга тапталы үөскэтэргэ аналлаах араас структуралар уонна хамсааһыннар бэрэстэбиитэллэрин түмтэ, диэн ЯСИА иһитиннэрэр.
Сессия чэрчитинэн Россия президенэ Владимир Путин патриотическай иитии салаатыгар туруорбут тирээн турар суолталаах соруктара дьүүллэһилиннилэр. «Бастакылар хамсааһыннара» курдук үлэлиир кииннэр уонна уопсастыбаннай хамсааһыннар үлэлэрин интеграциялааһыҥҥа, ону тэҥэ бу үлэҕэ анал байыаннай дьайыы кыттыылаахтарын тардыыга ураты болҕомто уурулунна.
С. Н.Донской-II аатынан институт дириэктэрин эбээһинэһин толорооччу Юрий Шишигин кыахтары холбооһун суолтатын тоһоҕолоон бэлиэтээтэ.
«Бүгүн үөрэхт министиэристибэтэ үөрэҕириини сайыннарыы уонна идэни үрдэтии институтун иннигэр патриотическай иитиигэ үлэни сатабыллаахтык ыытаарга бары күүһү, кыаҕы түмэр кыахтаахпыт диэн чуолкай соруктары туруорар. Россия дьоһун гражданнарын иитиигэ интэриэһиргээбит бары күүстэри түмүүгэ сүҥкэн кыаҕы көрөбүт. Чопчу биһиги күүспүт сомоҕолоһуутугар туруоруллубут сыалы ситиһиигэ мэктиэ баар», — диэн Юрий Шишигин бэлиэтээтэ.
Ыҥырыллыбыт дьон ортолоругар Арассыыйа Дьоруойа Александр Колесов, анал байыаннай дьайыы кыттыылааҕа Василий Местников, бойобуой дьайыылар бэтэрээннэрин дьыалаларыгар кэмитиэт бэрэссэдээтэлин солбуйааччы Дмитрий Паньков, ыччат дьыалатыгар уонна социальнай коммуникацияҕа миниистири солбуйааччы Александр Максимов бааллара.
Александр Колесов мустубут дьоҥҥо туһаайан, патриотизм диэн саҥа көстүү буолбакка, урукку кэм умнуллубут сыаннастарын сөргүтүү буоларын тоһоҕолоон бэлиэтээтэ.
«Сэбиэскэй Сойууска патриотизм үрдүк таһымҥа турара. Урусхал буолбутун кэннэ бу дьыаланы барытын умнубуппут. Итиэннэ 30 сыл буолан баран, ханна эрэ сыыһа-халты туттуу барбытын өйдөөтүбүт. Анал байыаннай дьайыы саҕаланыаҕыттан улаатан иһэр көлүөнэлэри бэлэмниир наадата биллибитэ», — диэтэ Арассыыйа Дьоруойа.
Кини итини сэргэ, патриотическай үлэни тэрийиигэ ыксаабакка, ситимнээх үлэни бары өттүттэн көрөн ыытар сыһыан наадатыгар болҕомтотун уурда.
«Кылаабынайа, сыал-сорук биир буолуохтаах, тоҕо диэтэххэ, “Бастакылар хамсааһыннара” баар, биһиэхэ “Юнармия», кадеттар, буойуннар бааллар. Сыаллар биир кэлимник түмүллүөхтээхтэр, оччоҕуна патриотическай иитии дьыалатыгар олус элбэҕи ситиһиэхпит», — диэн тоһоҕолоон бэлиэтээтэ Колесов.
Экспертнэй сессия патриотическай тыыны бөҕөргөтүүгэ уонна ыччат дойду инники кэскилин туһугар эппиэтинэстээх буолуутун үөскэтиигэ туһуламмыт холбоһуктаах стратегиялары оҥорууга уонна үлэ приоритетнай хайысхаларын быһаарыыга былаһаакка буолла.
