Сыл бүтүөр диэри Дьокуускайга оптуобус сылаас тохтобулларын ахсаана 89 буолуоҕа, оттон эһиил ахсаанын 100-кэ тиэрдиэхтэрэ. Бу туһунан регион киин куоратын баһылыга Евгений Григорьев «Куораты кытта быһа эфир» биэрии кэмигэр иһитиннэрдэ.
«Тохтобул элбэх буолуохтаах. Нэһилиэнньэ ону туруорсар, биһиги климатическай усулуобуйабытыгар сылаас тохтобул суол-тырааныспар инфраструктуратын олус наадалаах элемена буоларын мин да, кэллиэгэлэрим да бигэргэтэллэр», — диэтэ мэр.
Санатан эттэххэ, сабыылаах павильоннар быйыл «Областная больница», «Бааһынай ырыынага», «Манньыаттаах» уонна «Речевая школа» курдук тутаах тохтобулларга баар буолуохтара. Оптуобустары кэтэһэр сылаас павильоннар 07:00 чаастан 23:00 чааска диэри үлэлииллэр.
This post was published on 14.10.2025 18:08 18:08