1975 сылтан оскуолаҕа киириэн иннинээҕи саастаах оҕолору айылҕаҕа сынньатар Дьокуускайдааҕы 9 №-дээх «Якутяночка» оҕо саада сайыҥҥы даачатын уларыта тутарга бэлэмнэнэр. Быйыл тэрилтэ «Оонньуур Олимп» диэн ааттаах аныгы спортивнай комплексы тэрийэр көҕүлээһиннээх ППМИ-2026 бырайыагар кыттар, диэн ЯСИА иһитиннэрэр.
«Якутяночка» оҕо саадын сэбиэдиссэйэ Людмила Акиньшина этэринэн, бырайыак куорат эдэр олохтоохторугар толору сайдыылаах эйгэни тэрийиигэ туһуламмыт, онно спорт уонна көхтөөх олох оҕо сынньалаҥын быстыспат сорҕото буолуоҕа.
«Сыала — аҥардас ыраас салгыҥҥа оонньуулары тэрийии буолбакка, оҕоҕо кыра эрдэҕиттэн хамсааһыҥҥа, чөл үгэстэргэ тапталы иҥэрии. “Оонньуур Олимп” иитиллээччилэргэ дьиҥнээх сайдыы киинэ буолуон эрэннэрэр. Былаһаакка чаҕылхай уонна куттала суох эбийиэк буолан, үөрүүлээх эйгэни тэрийэн, көхтөөх оонньууларга табыгастаах буолууну хааччыйыа уонна кутталы аҕыйатыа. Бу хас биирдии оҕо дьоллоох, көхтөөх оҕо сааһыгар биһиги инвестициябыт», — диэн Акиньшина кэпсээтэ.
Оҕо саадын көҕүлүүр бөлөҕө сайыҥҥы даачаны тупсарыы уонна саҥа спортивнай комплекс тэриллиитэ тэрилтэ сайдыытыгар улахан суолталаах хардыы буоларын, оҕолор сайыҥҥы сынньалаҥнарын өссө дэлэйдик, туһалаахтык оҥоруохха сөбүн бэлиэтээтэ. Саҥа былаһаакка күн аайы кыра олимпиада курдук, хас биирдии оҕо кыайыылаах буолар сирэ буолара күүтүллэр.
This post was published on 06.11.2025 13:11 13:11